BAUKAU, STLTIMORLESTE.com – Autoridade Suku Fatulia kontinua halo reabilitasaun ba estrada rural husi Aldeia Uaitobono ba Sede Suku Fatulia, Postu Administrativu Venilale, Munisipiu Baukau, liu husi orsamentu Programa Nasional Dezenvimentu Suku (PNDS) tinan 2026.
Estrada refere iha tinan 2025 reabilita ona ho valor orsamentu rihun US$ 38 responde ba kilometru ida resin ho tipu cor beton, ateru, cor valeta metru 150 inklui cor deker, maibe la konsege termina, tanba orsamentu la sufisiente. Nunee tinan nee Suku deside kontinua aloka orsamentu husi PNDS hamutuk rihun US$ 37 resin kompostu fundus infraestrutura rihun us$ 32 no fundus operasional hamutuk rihun US$ 5 resin ba reabilitasaun estrada refere, nunee bele finaliza.
“Faze kotuk nee ita halao uluk nee iha fatin risku sira mak ita halo cor beton, agora ita tau hodi kontinua fali ida sorin sorin neebe ita husik hela,” Xefe Suku Fatulia, Angelino Moisés Perreia hateten ba jornalista sira iha Vila Nova Baukau, Segunda (11/05/2026)
Nia sublina, prosesu preparasaun ba reabilitasaun estrada rural refere tuir loloos finaliza ona, maibe iha preokupasaun balu, tanba nee adia ba semana oin, nunee bele hahu ona ba faze koutasaun ba kompanhia fornesedor material.
Prosesu koutasaun ba parte kompanhia fornesedor sei hahu iha loron 18 Maiu nee no bainhira termina prosesu koutasaun kompanhia manan nain bele hahu ona mobiliza material servisu reabilitasaun estrada refere.
Nia komenta, mezmu periodu rua orsamentu husi PNDS ba atividade regular ezekuta deit ba estrada Uaitobono, maibe parte Autoridade kontinua planu hodi haree mos kondisaun estrada ba Aldeia seluk iha Suku refere.
“Estrada Aldeia 4 nee ita prezisa melhora diak liu tan, tanba daudaun ezistensia estrada nee iha hela, ita sei koloka fundu PNDS ba faze sira nee,” Angelino katak
Entretantu Suku Fatulia iha Aldeia haat, mak hanesan Aldeia Bahadato, Ossouaque, Uatulia Ana no Uaitobono ho total populasaun rihun 2.721 husi xefe familia 688.
(tom)
