DILI, STLTIMORLESTE.com – Portavós Polísia Nasionál Timor Leste (PNTL), Superintendente Xefe Polísia, Joao Belo dos Reis hatete, kazu ómisidiu neebe akontese iha Aldeia Poros, Suku Mehara, Postu Administrativu Tutuala, Munisipiu Lautem, iha Domingu (10/5/2026) tuku 01: 30 OTL neebe rezulta Vincencio de Jesus Fernandes lakon vida, agora daudaun rejista ona iha Ministeriu Publiku (MP). Kazu nee polísia detein ona suspeitu nain 10 inklui oknum F-FDTL ida, suspeitu nain-10 nee kompostu husi LRH, DdSB, MBS, MF, MB, AF, RF, MG, IDC no LP, tanba nee kazu nee rejista ona iha Ministeriu Públiku ho Númeru Úniku Kriminál (NUK) 0028/2026.LACIC.
“ligadu ba kazu akontesimentu iha Aldeia Poros, Suku Mehara, neebe rezulta ita nia alin joven ida ho naran Vincencio de Jesus Fernandes mate fatin, ho ida tan alin Rivaldo Caetano Lopes mos hetan kanek, atuasaun nee entre grupu rua, entre grupu ida husi Suku Asalainu husi Lospalos nian ba fatin serimonia família nian iha Suku Mehara, Aldeia Poros, akontesimentu ida nee sira iha problema depois rezulta ita nia alin mane nee mate no depois polísia halo kedas atuasaun”, hatete Portavós Polísia Nasionál Timor Leste (PNTL), Superintendente Xefe Polísia, João Belo dos Reis liu husi Konferénsia Imprensa iha Komando Jerál PNTL, Kaikoli Segunda (11/05/2026).
Nia informa, hafoin akontesimentu kazu omisidiu nee polísia mos halo kedan koordenasaun ho parte F-FDTL ninian, tanba deskonfia autor sira neebe ba asalta fatin serimónia nee iha mos elementu F-FDTL balun.
“Nunee koordenasaun nee mak halo, depois sira halo kedas operasaun rezulta ema nain 10 kaptura iha fatin neeba, kazu nee rasik rejista ona ho númeru NUK 0028/2026.LASIC”, nia esplika.
Nia deklara, ho asaun neebe suspeitu sira halo iha kazu nee mak Ministeriu Publiku promove suspeitu sira ho krime omisidu argavadu tuir artigu 140, artigu 145 neebe koalia konaba Interupsaun ba gravidés neebe la hetan punisaun artigu 146 neebe konaba krime infantisisu artigu 185 neebe koalia konaba volasaun ba domisíliu no artigu 260 neebe koalia konaba Hahaat ho violénsia.
Nia informa, promove suspeitu sira ho krime ho omesidiu agravadu tanba baku malu iha fatin neeba depois rezulta ema nee mate.
Komandante João koalia, laiha separasaun prosesu ba iha oknum F-FDTL neebe envolve kazu kazu ómesidiu referenda, tanba nia hanesan sidadaun bain bain no prosesu nee la haree nia nee se.
“Laiha separasaun, kuandu membru husi instituisaun ida halo krime ita konsidera hanesan sidadaun bain bain. Neebe laiha halo separasaun ida iha neeba. Ita aprezenta hanesan sidadaun komún,” nia hatutan.
Nia haktuir, ba kazu nee rasik polísia halo hela koordenasaun ho parte F-FDTL atu haree ba kazu nee no Komandu F-FDTL aseita halo prosesu ba oknum F-FDTL nee.
“Ita-nia koordenasaun ho F-FDTL lao nafatin , saida mak nia halo laiha ligasaun ba iha nia knaar hanesan FDTL. Ita-nia hanesan oin hau hateten ona ita-nia koordenasaun ho parte F-FDTL lao diak diak teb-tebes, nunee prosesu hothotu ita sei submete ba iha Ministeriu Públiku,” nia dehan.
Belo hateten, motivu husi kazu nee iha hela prosesu investigasaun, tanba nee PNTL seidauk bele hatene motivu loloos husi kazu.
Nia esplika, fatin akontesimentu kontroladu tanba kooperasaun ho autoridade lokál joventude iha fatin neeba no mos mai husi F-FDTL sira apoiu seguransa iha neeba.
Nia dehan, mate isin agora prosesu autopsia sei lao hodi bele hatene lo-loos nia kronolijia nee no depois sei entrega ba nia família iha tempu badak hafoin remata autopsia.
(jen)
