DILI, STLTIMORLESTE.com – Bazeia ba desizaun husi Tribunal Rekursu (TR) ikus mai halo eviksaun ba rai iha Bebonuk, iha Aldeia Metin Tolu, neebe antes nee lori ba iha Tribunal entre parte rua Reu Lurdes Menezes no Autor Mari Alkatiri.
Prosesu nee nia andamentu sira iha Tribunal Judisial Primera Instansia Dili (TJPID) no Tribunal Rekursu (TR) lao hotu ona, tanba nee maka ikus mai hodi tama ba iha faze eviksaun.
“Hau la iha konesementu husi Tribunal konaba prejensa Tribunal nian iha nee, tanba depois revogasaun ba iha Tribunal Rekursu (TR), Juiz nain tolu neebe halo revogasaun ba sira nia desizaun rasik, antes deside absolve totalmente Lurdes husi prosesu, depois halo revogasaun deside parsial, katak o nian sorin hau nian sorin ita fahe rua deit,” dehan Advogadu Privadu, Octavio Cardozo ba Jornalista sira iha Bebonuk, Sesta (15/05/2026).
Nia hatutan, mosu duvidas se sira mai ho mapamentu uluk TJPID atraves akordaun TR ba iha pontu 1 pontu 9 no 10 konaba supervisiu rai neebe iha konesementu husi Diresaun Terras Propriedade maka nomea sira nia ekipa ida, neebe Tribunal husu apoiu sira maka tun mai sukat, no difisil atu define nia supervisiu.
Esplika tan, dalan maka rekursu extraordinariu kuandu la simu nia revogasaun, no iha dokumentus neebe iha autor nunka menan dala ida, afavor ba Lurdes. No rekursu halo re julgamentu iha TJPID nafatin afavor ba Lurdes, sae ba iha TR mos deside afavor ba Lurdes maske foin reklamasaun primeiru akontese iha Timor, hodi reklamasaun ida muda desizaun ka muda akordaun TR.
Sublina, TJPID nia desizaun dala rua afavor ba Lurdes, TR nia desizaun dala ida haruka re julgamentu akordaun dala ida tan afavor ba iha Lurdes. No julga parsial laos total signifika katak, rai neebe lori ba tomak boot ida, depois TR fo desizaun absolve tiha Lurdes ikus mai liu husi reklamasaun TR fahe tiha rai nee ba rua.
Tanba nee primeiru totalmente absolve akordaun, no segundu mesmu Juiz revoga desizaun maibe iha neeba hateten dehan deside parsial fahe ba rua, bazeia ba dokumentus neebe Lurdes aneksa iha prosesu.
Afirma, hanesan Advogadu hare ba desizaun TR neebe tun ona, se sira sobu hakarak husu deit supervisiu rai neebe Terras Propriedade mai sukat nee iha neebe, lori ida nee maka sobu, laos lori fali parsial ida neebe Lurdes hatama ba maka sobu.
Tuir observasaun STL nian, Reu la marka prejensa iha fatin, maibe reprezenta husi nia mandatariu, Octavio Cardozo. Tanba nee eskavator atu hahu sobu kalen neebe didin hela, Advogadu husu atu ofisial justisa husi Tribunal nian esplika konaba rai nia luan neebe halo eviksaun, nunee bele tuir desizaun neebe sai.
Ho ida nee Eskavator sobu kalen neebe didin hela, halo tetuk rai nee to kedan baliza Lurdes nian.
Desizaun neebe sai husi Tribunal deside katak, autor iha direitu propriedade konaba terenu ho area 16.115 m, ho parsela 1. 560 M koresponde dominiu parsela B.
Observasaun iha terenu, prosesu eviksaun nee hetan seguransa masimu husi autoridade seguransa, no observa direita husi autor Mari Alkatiri.
(ter)
