DILI, STLTIMORLESTE.com – Prezidente Republika (PR), Jose Ramos Horta prezide reuniaun Konselhu Estadu hodi koalia konaba intrese nasional.
Bainhira remata hasoru malu, portavos atual asesor Prezidensia Republika, Joao Aparicio ba Jornalista iha palasiu Prezidensial Nicolau Lobato Bairo Pite, Kinta (15/05/2026) sente haksolok tebes tanba iha reuniuan Konsellu Estadu partisipa husi lider istoriku sira, hanesan Eis Prezidente Republika Francisco Guterres Lu Olo, Eis Prezidente Republika Taur Matan Ruak, Primeiru Ministru Kay Rala Xanana Gusmao, Jeneral Reformado Lere Anan Timur no seluk tan.
“Uluk-nanai hau hakarak dehan deit katak ita haksolok tebes tanba ita-nia lider istoriku sira tur hamutuk hodi koalia, hodi dialoga konaba interese nasional nian. Ida nee mak sai pontu esensial,” dehan Portavos.
Portavos dehan atu fo hatene deit katak reuniaun ida-nee reuniaun Konsellu de Estadu ida bee hanesan reuniaun exepsional. Nee signifika katak reuniaun Konsellu de Estadu nian nee laos tuir buat neebe estabelese iha artigu Konstituisaun da Republika nian, maibe Prezidente entende katak importante tebes bolu membru hotu-hotu Konsellu de Estadu nian atu bele koalia kona-ba situasaun rai-laran nian.
“Ida nee mak ohin sira koalia no trata. Hau la bele fo sai konteudu tanba dever de sijilu, dever de sijilu nee la permite atu fo sai konteudu reuniaun Konsellu de Estadu nian, no mos kona-ba deliberasaun neebe foti, deliberasoens tomadas iha Konselhu de Estadu nian,” katak nia.
Nia hatete, Prezidente konvoka membru sira hotu, inklui prezensa Governador Banku Sentral nian. Portantu, signifika katak halo analiza klean ida kona-ba aspetu ekonomia global, neebe nian impaktu mai iha ekonomia rai-laran nian.
“Neduni saida mak Timor-Leste tenke halo iha nivel intermu atu bele enfrenta situasaun sira-neebe fo benefisiu ba povu nian no ba benefisiu nasaun nian,” katak nia.
Reunaiun Konsellu Estadu nee prezide husi Prezidente Republika Jose Ramos Horta, no partisipa husi membru Konselhu Estadu sira mak Primeiru Ministru Kay Rala Xanana Gusmao, Eis Prezidente Republika Taur Matan Ruak, Eis Prezidente Francisco Guterres Lu Olo, Jeneral Reformado Lere Anan Timur, Prezidente Parlamentu Nasional Maria Fernanda Lay, Eis Deputada Josefa, Madre Guilermina Marcal no partisipante seluk tan.
(eme)
