DILI, STLTIMORLESTE.com – Atu suporta nesesidade moris hakarak ka lakohi fahe tempu ajuda inan-aman buka osan liu husi faan bandeira, hodi uza ba nesesidade eskola loron-loron, liu-liu sosa material eskola.
Dehan Deonicio de Jesus nuudar Estudante Pre-Sekundaria Cristal ba STL iha Tasi-Ibun Palasiu Governu, Dili, Domingu (17/5/2026).
Tuir Deonicio nia hola parte faan bandeira husi tinan 2015 iha tempu nee ba nia foin halo tinan 9, maibe lao ho nia maun juda faan bandeira ona, neebe agora faan mesak mos hatene ona.
“Hau eskola iha Pre-Sekundaria Cristal ho nivel edukasaun tinan nee klase-II ona nee duni fahe tempu mak faan bandeia, ba komemorasaun loron restaurasaun da independensia Timor-Leste (TL) ba dala-24 neebe sei monu iha dia 20 de Maiu 2026,”katak Deonicio.
Estudante oitavo ano Eskola Pre-Sekundariu Cristal neebe dadaun atinji ida 14 nee fundamenta, tinan nee nia hahu faan bandeira husi dia 1 de Maiu, bandeira neebe nia faan sosa tutan husi Xina iha medida tolu (3) tanba nee nia folin tuir nia medidas, kiik liu ho folin 0.50 centavus, boot naton faan ba tahan ida ho folin US$ 5, tuir mai bandeira neebe ho medidas metru 2 ho folin US$ 7 kada tahan. Durante faan bandeira neebe folin liu mak ida kiik ho ida boot naton, ema gosta sosa kiik tau ba motor-karreta. Lukru husi faan bandeira tuir tempu dalaruma loron ida hetan US$ 5 too US$7, dalaruma loron ida hetan deit US$ 3, maibe kontente nafatin faan tanba aproveita tempu hanesan nee hodi bele buka netik osan oituan lori sosa lapis-kadernu no seluk tan ba nesesidade eskola.
Durante faan bandeira too ohin dia 17 Maiu vendedoras neebe gosta sosa nia bandeira laos ema kiik deit iha mos ema sira neebe funsionariu boot mos sosa, dalaruma sira sosa fo liu osan oituan hodi dehan ba nia ida nee alin-oan uza sosa bee hemu.
“Sira balun dalaruma fo korajen mai hau hodi dehan faan didiak ba kuidadu-aan, kuidadu karreta-motor neebe tuur iha ninin mak faan,” haktuir Deonicio.
Tuir observasaun STL kada tinan too ona dia 1 de Maiu komunidade barak liu-liu joven no labarik sira feto-mane sempre faan Bandeira Nasional RDTL hahu husi area Colmera liu ba Hotel Timor nia ona too tasi-ibun Palasiu Governu, tanba nee komemorasaun 20 de Maiu tinan nee negosiante sira nafatin faan bandeira husi Colmera too Palacio Governu nia oin. Objetivu ba sira faan bandeira aproveita tempu komemorasaun loron restaurasaun da independensia RDTL kada tinan.
(ger)
