DILI, STLTIMORLESTE.com – Ministru Justisa (MJ) deklara katak, estatutu Guarda Prizional sira nian iha ona faze final, hodi halo aprovasaun ajusta.
“Estatutu Guarda Prizional sira nian iha ona faze final, iha ona Konselhu Ministru, hein deit halo ajustamentu buat balu atu bele lori fali ba iha Konselhu Ministru hodi halo aprovasaun ajusta,” dehan Ministru Justisa, Sergio Hornai ba jornalista sira iha Kaikoli, Segunda (18/05/2026).
MJ hatutan, tuir loloos iha tinan kotuk maibe ho ajenda servisu lei estruturante lubuk ida neebe halo, agora halo submisaun iha ona Ministru Prezidente Konselhu Ministru lori ba iha KM atu halo re abertura fali hodi fo kontinuidade, maibe konaba orsamentu no numeru la iha ona problema.
Iha fatin ketak, Jurista Jose Maria Guterres dehan, presiza duni kria estatutu Guarda Prizional, atu fasilita sira halao servisu ho diak.
“Hau hanoin importante duni kria estatutu Guarda Prizional, hodi apoiu sira halao servisu ho diak, tanba sira nia servisu importante tebes, atu tau matan ba dadur sira,” dehan nia.
Afirma tan, servisu atu lao diak presiza iha estatu ida atu regula sira, atu sira bele halao servisu ho diak liu tan.
Aleinde nee, Akademiku Rafael de Jesus dehan, papel Guarda Prizional sira importante atu asegura dadur sira. Tanba nee husi Ministériu Justisa bele iha planu neebe diak, kordena ho parte hotu atu halo aprovasaun ba estatutu Guarda Prizional nian.
(ter)
