BAUCAU, STLTIMORLESTE.com – Stok kombustivel husi Governu neebe aloka liu husi Ministeriu Agrikultura, Pekuaria, Peskas no Floresta (MAPPF) ba Servisu Munisipal Agrikultura Baucau atu apoiu fila rai gratuita ba agrikultores sira, atual stok mamuk.
Diretor Servisu Munisipal Agrikultura Baucau, Agostinho Ximenes aprezenta, kombustivel Governu ba fila rai gratuita neebe objetivu atu fasilita agrikultor sira iha baze atu aumenta numeru produsaun iha rai laran, iha neebe kada tinan Ministeriu Agrikultura Pekuaria Peskas no Floresta liu husi Diresaun Nasional apoiu ba kada Servisu Munisipal sira aloka ba epoka rua ho litru hamutuk rihun 10, maibe atual Servisu Munisipal Agrikultura Baucau labele atende pedidu husi agrikultor sira ba apoiu fila rai gratuita, tanba laiha kombustivel.
“Nee 2025 nian mak ita uza mais 2026 nian seidauk, entaun ita uza hotu mina 2025 agora natar barak mak sei abandona, tanba mina ida fila rai gratuita nee hotu ona, maibe seidauk mai,” Diretor Servisu Munisipal Agrikultura Baucau, Agostinho Ximenes hateten ba STL iha nia knaar fatin Vila Nova, Baucau, Segunda (18/05/2026).
Nia esplika, husi kombustivel litru 10 neebe Servisu Munisipal Agrikultura Baucau hetan iha tinan 2025 ba epoka rua nian, gastus ona ba natar hektare 332, iha neebe tuir estimasaun kada hektare gastus litru 30.
Nia sublina, husi hektare 332 neebe Servisu Munisipal Agrikultura Baucau responde ho kombustivel gratuito litru 10 responde ba area produsaun hare nian, iha Postu Administrativu Venilale neebe natar sira pertense ba irigasaun Galata, Vemasse no Baucau Vila hanesan Bucoli, Samalari no Seiçal.
“Larisula Baguia ita seidauk ba pedidu iha ona mais mina seidauk mai, entaun barak labele fila hotu komunidade nia pedidu neebe mai bara-barak mais mina mai limitadu,” Agostinho akresenta.
Nia argumentu, mezmu provizoriu stock kombustivel ba fila rai gratuita iha Servisu Munisipal Agrikultura Baucau mamuk, maibe nafatin iha koordenasaun ho parte Nasional nunee bele solusiona, tanba atual agrikultor sira nia natar balu seidauk halai.
(tom)
