DILI, STLTIMORLESTE.com – Polísia Nasionál Timor Leste (PNTL) Munisípiu Díli iha ona preparasaun masimu atu fo seguransa ba selebrasaun loron restaurasaun independénsia ba dala XXIV iha Tasi-Tolu, loron 20 Maiu 2026.
Nia dehan, Komando Polísia Díli simu ona despaixu husi Komando Jeral PNTL hodi halo preparasaun seguransa atu asegura selebrasaun loron restaurasaun independénsia iha loron 20 Maiu iha Tasi-Tolu atu bele lao ho diak no hakmatek.
“Ami halo preparativu ba seguransa ba loron restaurasaun nee, primeiru ami halo sosializasaun ba iha ita nia estudante sira, halo mos diálogu ho ita nia líder komunitariu ho komunidade sira para ita bele garante seguransa molok ita tama iha komemorasaun loron restaurasaun independénsia nian,” hatete Komandante PNTL Munisípiu Díli, Komisáriu Asistente Polísia Orlando Gomes ba jornalista sira iha Eskuadra Dom Aleixo, Segunda (18/05/2026).
Orlando Gomes informa, Komando Díli sei koloka membru polísia sira no mos Polísia Unidade seluk ba iha fatin serimónia komemorasaun loron restaurasaun independénsia, no durante selebrasaun nee PNTL sei halo mos patrullamentu lao ain tama bairu sira iha kapitál Díli, nunee garante ema hotu seguru ba festeza loron restaurasaun independensia.
“Ita halo patrullamentu lao ain tama sai bairu laran sira para garante situasaun seguransa iha Kapitál Díli lao ho diak, neebe envolve mos husi Unidade Espesiál Polísia, Unidade Polísia Marítima, Unidade Patrullamentu Fronteira hodi garante seguransa ba loron independénsia,” katak nia.
Komandante Polísia Munisípiu Díli nee informa, sira halo ona koordenasaun ho Unidade Espesial Polísia atu koloka postu rua ba iha fatin atividade konsertu no espozisaun no mos ba fatin serimonia ninian, tanba iha bainaka espesial husi rai liur neebe mos tuir ajenda sei partisipa iha komemorasaun loron restaurasaun independénsia nee.
Iha fatin hanesan, Akademista UNPAZ, Jose da Costa Soares hateten, selebrasaun loron restaurasaun independénsia ba dala-XXIV iha Tasi-Tolu, 20 Maiu tinan 2026 nee importante, tanba loron nee sepesial tebes ba povu Timor Leste (TL), nunee povu tenke partisipa hodi selebra loron restaurasaun independénsia ba dala-XXIV ho diak..
“Ita husu ba PNTL atu fo segurasan masimu ba loron restaurasaun independénsia neebe halao iha Tasi-Tolu nee, atu nunee selebrasaun nee lao diak no susesu, tanba ita nia inan aman no joven sira hakarak partisipa loron importante ida nee,” nia afirma.
(jen)
