DILI, STLTIMORLESTE.com – Tribunal Judisial Primeira Instansia Dili (TJPID) halao julgamentu ba krime Ofensas Integridade Fizika Simples, neebe mak komete husi arguida nain tolu inisial AM, MVM no CCdSM hasoru lezada insial MT.
Antes atu hahu julgamentu, Juiza deklara krime ofensas integridade fizika simples nee natureza simples, tanba nee bainhira vitima konkorda hodi dame malu ho arguida sira, Tribunal bele omologa kazu nee.
Tribunal deklara, krime nee natureza simples, tanba nee lei fo dalan ba vitima no arguida sira bele dame, maibe depende ba vitima nia deklarasaun.
Nunee Tribunal konfirma ba vitima, bainhira vitima iha inisiativa rasik hodi dame ho arguida sira lei fo dalan.
Vitima MT deklara katak, kazu nee simples no akontese kleur ona, tanba nee vitima konkorda hodi dame malu ho arguida sira.
No arguida sira mos konkorda, nunee arguida sira husu deskulpa ba vitima hodi dame malu.
Ministeriu Publiku deklara, krime nee nia natureza simples tanba nee bainhira vitima no arguida konkorda hodi dame malu, Ministeriu Publiku aseita pedidu vitima no arguida nia.
No parte Defeza mos aseita Ministeriu Publiku nia deklarasaun, nunee husu Tribunal atu omologa krime hodi absolve arguida sira.
Nunee Tribunal deside hodi omologa kazu nee, no absolve arguida sira husi krime neebe mak Ministeriu Publiku duun ba arguida sira.
Iha Indisus sufisiente katak, iha loron 6 fulan Agostu tinan 2024 por volta 10h30, fatin Aldeia Toko Baru, II. Kuluhun, Dili, ofendida MT hamutuk ho arguida sira ba rezolve problema rai iha autoridade lokal.
Bainhira rezolve hotu problema sira atu fila mai uma, maibe too Iha dalan arguida sira halo agresaun hodi rakut, tuku tebe les ofendida nia ropa no sama nia telemovel halo rahun.
Arguida MVM lori liman rakut iha ofendida nia kakorok parte los halo kanek.
Arguida AM lori liman rakut ofendida nia fuk, hodi tebe no tuku no mos kontinua dudu to o monu ba rai.
Ofendida nia telemoval marka Iphone 6 monu ba rai, tamba nee arguida CCdSM lori ain sama too rahun.
Ofendida hamrik hodi lao, maibe arguida sira nafatin kontinua duni tuir hodi arguida MVM rakut ofendida nia kamiza halo nakles.
Arguida sira halo agresaun hasoru ofendida, tamba sira iha ona akordu konaba ema arenda rai neebe fulan tolu selu ba arguida sira, no fulan tolu selu ba iha ofendida maibe arguida sira la aseita atu selu ba ofendida.
Konsekuensia husi agresaun nee ofendida hetan moras iha fatin atinjidu, no mos nia telemovel no kamija hetan estragus.
Arguida sira hatene katak, bainhira rakut ema nia isin tebe tuku bela kauza ema moras no sama no les ema nia sasan bele hetan estragus, maibe sira halo nafatin saida mak sira nia hakarak.
Arguida sira halo krime ho livre, deliberada, konsentemente no hatene katak, hahalok nee probidu no hetan pena tuir lei.
Tanba nee konsidera arguida sira hanesan ko-autor material ba konkursu krime ofensa ba integridade fizika simples previstu tuir artigu 145 nº 1 no krime dano simples previstu tuir artigu 258 nº 1 hotu-hotu husi kodigu penal.
Audensia Julgamentu nee, prezide husi Juiza Singular, Ercilia de Jesus, Ministeriu Publiku reprezenta husi Prokurador Nelson Magno, no arguida sira hetan asistensia legal husi Defensor Publiku, Juvinal Dias.
(ter)
