DILI, STLTIMORLESTE.com – Prezidente Republika (PR), Jose Ramos Horta halo enkontru ho Embaixador Brazil, Ricardo Leal, hodi diskute hamutuk kona-ba hametin kooperasaun bilateral rai rua.
Bainhira remata halo enkontru, Embaixador Brazil, Ricardo Leal ba jornalista sira iha Palasiu Prezidensial Nicolau Lobato, Bairo Pite, Sesta (22/05/2026) hatete, enkontru ohin oinsa hametin kooperasaun rai rua entre Brazil no Timor Leste.
Embaixador Brazil dehan, hasoru malu ho Prezidente Republika hodi koalia konaba kooperasaun Timor Leste ho Brazil nia.
“Konaba rezolve kestaun sira kooperasaun nian ho Brazil, operasaun ida neebe fo onra tebes ba ita, no hanoin konaba senariu sira ba dezenvolvimentu kooperasaun ida-nee nian, no mos haree fila fali artikulasaun sira iha nível multilateral neebe envolve tantu Brazil no Timor Leste, hanesan rekuperasaun, haree ba momentu ida-nee,” katak Embaixador.
Embaixador hatete, buat neebe durante nee Brazil apoiu ba Timor Leste mak foka ba hametin divulgasaun lian portugues neebe halao daudaun iha Ministeriu Edukasaun no seluk tan.
“Buat neebe foka ba hametin divulgasaun dalen Portuges iha Timor, projetu ida neebe oras nee halao daudaun ho Ministeriu Edukasaun no seluk tan neebe lao daudauk ona. Aumenta setor judisial, Defensoria Publika, iha posibilidade atu habelar kooperasaun neebe sei konsidera devidamente tantu iha Brazil no iha espíritu amizade no armonia nian,” katak nia.
Nia akresenta tan katak, iha enkontru nee koalia mos kona-ba hametin planu kooperasaun no multilateral, oinsa nasaun rua bele hametin liu tan lasu amizade.
Iha biban nee Prezidente Republika Jose Ramos Horta hatoo benvindu ba Embaixador Brazil, Ricardo Leal, oinsa bele hametin kooperasaun no oinsa bele hametin lasu amizade entre Timor Leste no Brazil.
(eme)
