DILI, STLTIMORLESTE.com – Inspetor eskolar husi Edukasaun Munisipiu Dili nafatin halo koordenasaun servisu ho direjente eskola neebe lokaliza iha Munisípiu Dili, tanba servisu inspesaun iha tipu tolu (3).
Haktuir Superintendente Edukasaun Munisípiu Dili, Cesarina C. Guterres ba STL iha nia knaar fatin, Sesta nee (22/05/2026).
“Ami nian linha koordenasaun husi inspetores eskolar no dirijente eskola lao diak, ami nian inspesaun servisu iha tipu 3 mak hanesan, inspesaun rutina, preventiva no investigativa. Loron loron inspetores sira sempre halao aktividade ho tipu rutina loro-loron,” nia dehan.
Cesarina dehan, atividades inspesaun ba eskola sira nee lao nafatin, liu-liu halo inspesaun ba atividades hotu neebe mak lao iha eskola ida-idak, tantu atividades ensinu prosesu aprendizajen no atividades seluk neebe lao iha eskola sira.
“Ami nian linha koordenasaun servisu nian ho ita nian direjente eskola sira nee diak tebes, bainhira ita nian eskola hasoru difikuldade ruma, nee sira fo hatene mai ami, nunee ami hatoo fali ba iha parte nasional,” nia informa.
Iha parte seluk Diretor Servisu Edukasaun Munisipiu Ainaro, Patricio da Costa Magno dehan, servisu Edukasaun Munisipiu Ainaro nafatin halo koordenasaun neebe diak ho parte inspetores sira, neebe halo identifikasaun profesores iha eskola sira.
“Kona-ba ita nian eskola hira mak atu aumenta profesores, nee ita seidauk hatene, tanba ita nian inspetores eskolar sira mak sei halo hela identifikasaun ba iha eskola sira, nee duni ami sei kordena ho sira, maibe ita nian eskola barak mak presiza atu aumenta profesores, agora ninia kualidade nee mak ita seidauk hatene lo-loos, tanba ita nian inspetor sira mak toma konta ba iha postu ida-idak,” nia dehan.
Nia hatutan, identifika profesores iha eskola, nee husi parte inspetor sira seidauk entrega relatóriu ba Edukasaun Ainaro, nee duni presiza kordena ho sira, tanba inspetor ida toma konta eskola sanolu too rua nolu. Total eskola neebe lokaliza iha Munisipiu Ainaro hamutuk ho eskola Cafe 94, nee ba ensinu baziku no filial, tekvo tolu, sekundariu ualu, nee sira ho paralelu.
(jac)
