DILI, STLTIMORLESTE.com – Komisariu Komisaun Anti Korupsaun (KAK) realiza serimonia asinatura ofisial ba projetu dezenhu futuru edifisiu KAK nian, ho Mohammad Sulaiman Mat Isah, reprezentante kompahia manan nain Khairi Consultant SDN BHD husi Malazia, no ho ninian konsorsium lokal Linier Unipesoal LDA.
Kompanhia sei halao servisu konsultoria ba dezenhu enjenaria neebe detalhu ba konstrusaun edifisiu foun KAK nian, ho valor projeitu hamutuk US$ 136.560,00. Durasaun kontratu servisu dezenhu nee sei halo iha fulan 3 nian laran.
Komisariu KAK Rui Pereira Dos Santos iha ninia intervensaun hateten, prosesu dezenha ba edifisiu foun KAK nian lori tempu naruk, tanba hetan difikuldades. Kompanhia vensedor anterior la konsege konklui ninian servisu dezenha edifisiu KAK nian too final report.
“Nia so halo deit inception report, interim report no draft final report. Falta deit final report mak la konsege finaliza husi tinan 2014 too tinan 2024 iha tempu Komisariu KAK Sergio Hornai,” dehan Komisariu Rui ba jornalista sira iha Farol, Sesta (22/05/2026).
Komisariu hatutan, hafoin simu pose nuudar Komisariu KAK fokus liu ba infraestrutura KAK atu prepara KAK nian fasilidade baziku nuudar membru ASEAN-PAC ba dala 11. Ho nunee, Komisariu ohin realiza serimonia nee nuudar pasu importante atu instituisaun KAK bele iha rasik edifisiu apropriadu no sufisiente ba servisu operasional KAK nian iha futuru, nuudar instituisaun publiku autonoma iha luta prevene no kombate korupsaun.
Nia sublina, parabens ba reprezentante Khairi Consultant, Senhor Sulaiman, hamutuk ho ninian parseira lokal Linier Unipesoal Lda neebe hetan fiar husi Governu Timor Leste liu husi MPIE, CNA no KAK hodi finaliza dezenhu nee, maske ho valor kiik. Tuir kontratu kompanhia sei finaliza iha fulan tolu nia laran.
Komisariu afirma, Kompanhia konsultan Khairi Consultant SDN BHD nuudar kompanhia jigante iha Malazia no maioria manan projetu boot iha Malazia, maibe sira hakarak kontribui mos ba prosesu dezenvolvimentu nasional liu-liu instituisaun KAK Timor Leste, maske ho projetu valor kiik.
Iha fatin hanesan, reprezentante kompanhia Khairi Consultant Malazia, Mohammad Sulaiman Mat Isah dehan, laran kontenti orgulhu no gratidaun ba fiar neebe KAK depozita ba nia kompanhia consultant, hamutuk ho ninian parseiru lokal Liniear Unipessoal Lda, hodi manan konkursu publiku ba projeitu dezenhu futuru edifisiu KAK nian.
“Ami espresa ami nia gratidaun no orgulhu hodi kontribui ami nia perísia ba dezenvolvimentu iha Timor Leste, partikularmente iha KAK,” dehan nia.
Nia hatutan, sira la preokupa ho medida investimentu nian, maibe hein no asegura projeitu ida nee ninian susesu. Lori lideransa empreza nia naran, hakarak hato nia agradesimentu ba konfiansa ida nee.
Sasin ba serimonia asinatura ofisial projeitu dezenu futuru edifisiu CAC nian nee mak Komisariu Adjunto CAC nain tolu, Komisariu Adjunto ba asuntu Investigasaun Kriminal Alvaro Maria Freitas, Komisariu Adjuntu ba Servisu Apoiu Kooperasaun Miguel Acacio Faria, Komisariu Adjuntu Prevensaun no Sensibilizasaun Rosario Salsinha Araujo, reprezentante Ajensia Dezenvolvimentu Nasional ADN no estrutura ezekutivu KAK nian.
(ter)
