ERMERA, STLTIMORLESTE.com – Komunidade iha Suku Railaku, Postu Administrativu Railaku, Munisipiu Ermera dadaun nee preokupa tebes, deskonfia tanba atividade prostituisaun neebe kria iha Merkadu Railaku.
Fontes konfirma husi komunidade katak, deskonfia iha Merkadu Railaku kria fatin seksu livre ka prostitusaun, tanba nee husu ba Autoridade Lokal sira atu fo atensaun masimu ba fatin neebe halo relasaun seksual livre iha Merkadu Railaku, tanba dadaun nee kazu HIV iha Munisipiu Ermera sae ba 53.
“Ami preokupa teb-tebes ba fatin seksu livre neebe halo iha Merkadu Railaku. Ita koalia konaba HIV, maka fatin seksu livre iha Merkadu tenke taka tanba ida nee fo impaktu ba ema,” hatete fontes konfirmadu husi komunidade wainhira partisipa iha programa sensibilizasaun konaba virus HIV iha Suku Railaku, Postu Administrativu Railaku, Munisipiu Ermera, Segunda (25/5/2026).
Administradora Postu Railaku, Micaela dos Santos informa iha tinan kotuk 2025 iha Merkadu Railaku iha duni atividade prostitusaun ka fatin seksu livre, tanba Merkadu Railaku nee besik Sidade Dili, no sira husi Sidade Dili mos mai faan sira nia sasan iha Merkadu Railaku.
“Informasaun neebe ohin ami rona katak ema halao atividade prostitusaun iha Merkadu Railaku, nee aproveita sira mai faan sasan, maibe ita servisu koordenasaun ho parte seguransa para ita bele ba haree no too agora ita la identifika ona fatin neebe antes nee halo relasaun seksual,” nia tenik.
Nia esplika, fatin prostitusaun nee no Jestaun Merkadu Ermera nian sei nafatin kontrola ba Merkadu Railaku neebe antes nee iha fatin prostitusaun.
“Iha Merkadu Railaku iha bazar semanal, laos lor-loron, kuandu bazar Tersa feira, entaun ema neebe maka ba faan sasan nee Segunda lokraik nee sira tenke ba ona, maibe iha Segunda meudia nee ekipa komesa ba halo monitor ona iha merkadu laran,” nia deklara.
Nia informa, tanba antes nee atividade fatin seksu livre nee akontese duni, maibe dadaun nee Ekipa Jestaun Merkadu Munisipiu Ermera halo ona kontrola ba movimentu iha Merkadu Railaku.
“Ita hakarak labele akontese tan, Ekipa Jestaun Merkadu sempre kontrola no rona informasaun lao oinsa, maibe sira rona duni informasaun husi komunidade balun katak iha Merkadu laran atividade prostitusaun iha duni, maibe iha minutu nee kedas sira sobu kedas fatin nee, depois agora ba oin sira halo kontrola iha merkadu,” nia koalia.
Nia hatutan iha tinan 2025, atividade prostitusaun nee lao, tanba nee Ekipa Jestaun Merkadu foin identifika ba atividade nee rasik.
Iha fatin hanesan, Prezidente Institutu Nasionál Kombate HIV-SIDA (INCIDA) Daniel Marcal hatete, dadaun nee kazu HIV transmite makaas liu nee husi relasaun seksual livre.
“Ita haree agora kazu HIV nee transmite makas liu nee liu husi relasaun seksual, tanba relasaun seksual maka dezafiu boot ida ita atu kontrola nee, nomos iha informasaun balun no ita nia komunidade sira preokupa katak sira identifika merkadu balun iha atividade seksu livre ka fatin prostitusaun, diak liu kansela tiha,” nia informa.
Nia husu ba Autoridade lokal sira tenke antisipa lalais hodi kansela fatin risku ba seksu livre nee rasik.
“Depois tenke identifika ita nia maluk sira neebe oras nee uza fatin sira nee no labele ameasa sira, maibe bolu sira mai para ita konsola sira, tanba buat ida seksu livre nee laos problema seluk, maibe problema osan, ba nesesidade basiku lor-loron nian, los duni balun halo relasaun seksual tanba domin, maibe ita agora haree dadaun ida risku makaas nee maka ida tanba osan nee,” nia deklara.
Nia koalia, fatin sira neebe uza ba fatin deskansa oras ida no oras rua nee para fasilita hodi seksu livre nee.
“Tanba fatin seksual livre ka prostitusaun nee iha risku teb-tebes katak kontribui ba transmisaun HIV nee boot loos, sei iha fatin seksu livre tenke identifika lolos kansela. Ita nia alin feto balun neebe sevisu neeba keta duni, keta ameasa, maibe bolu sira mai konsola didiak, tanba ema nia istilus moris nee maka halo ema sai hanesan nee,” nia afirma.
(jen)
3 Responses
ola! ho respeitu no husu ba ita boot sira publika notisa tenki hare didiak nia kazu” tamba ne’e tenki hadia nia titulu Notisia, segundu hakere notisia tenki invistiga ka husu dididak nia faktus husi kazu ne’e rasik, tenki hakerek situs informasaun ho klaru labele indetifika notisa ho lokalizasaun ne’ebe la los.
Título notícia la condiciona ho conteúdo
Favor ida Hau hanesan Railaco oan la Kontnte ho Noticia Ida bot sira Publika Iha Publiku hanesan Railaco oan Kontra tebes ita nia Noticia Ne,hatudu katak Ita bot sdk Iha capacidade hanesan Jornalista ida,nia Topiku n Hanesan Menhina Ka Hatun Ami Railaco oan nia dignidade,ita bot nia Topiku n hanesan Atu Comvida Ema hotu husi Monicipiu hotu hakarak sex livre mai iha Mercado Railaco,sei sente sdk Profisional Karik Ba eskola tan lai para Hakerek buat rumah ema Publiku bele kmprnde