Postu Administrativu Railaku Rejistu Kazu HIV 8

ERMERA, STLTIMORLESTE.com – Dadaun nee iha Postu Administrativu Railaku, Munisipiu Ermera, kazu foun pozitivu HIV hamutuk nain ualu (8).

Informa Xefe Departamentu Programa Saude iha Munisipiu Ermera, Liborio Martins ba jornalistasira wainhira partisipa sensibilizasaun virus HIV iha Suku Railaku Karaik, Segunda (25/05/2026).

“Ita hanesan ema humanu, ita buka meius para salva sira, ema sira nain 8 neebe pozitivu ona ba HIV, durante sira nia moris mak halo tratamentu hemu aimoruk ARV,” dehan Xefe Departamentu Programa Saude iha Munisipiu Ermera nee.

Nia esplika, importante liu mak ba teste HIV-SIDA, labele tauk ba test raan, tanba liu husi test raan mak foin hatene pozitivu HIV ou lae.

“Dadaun nee ita identifika iha Postu Railaku iha nain 8 neebe pozitivu HIV neebe daudaun nee halao hela tratamemtu, no tinan kotuk iha nain ida mak mate,” nia deklara.

Iha fatin hanesan, Diretor Institutu Nasionál Kombate HIV-SIDA (INCIDA), Daniel Marçal esplika, kazu foun HIV daudaun iha Postu Administrativu Railaku nee rejistu ona nain ualu (8).

“Ita haree nain ualu nee barak ona, sei transmite husi relasaun seksual nee barak, agora ema nain ualu nee husi Dili mak mai ka ema rai nain Postu Railaku, tanba nee ita tenke antisipa lalais,” nia informa.

Governante informa, Komunidade Railaku tenke taka estrada HIV nian nee, tanba Suku Railaku Karaik iha ona bee matan ualu (8), nee perigozu ba saude no ba joven sira nia futuru.

“Iha Postu Railaku kazu HIV 8, nee signifika iha bee matan 8, maibe se mak ba ona kuru bee nee, nee kuidadu sei la test raan agora no la hemu tan aimoruk nee ita ba aldeia la fila ona, tanba ita susar atu indentifika, neebe idak-idak tenke iha konhesimentu ba ita nia aan rasik, hodi taka dalan ba HIV,” nia afirma.

(jen)