DILI, STLTIMORLESTE.com – Komunidade husi Aldeia Manu-Meta, Suku Bidau Santana, Postu Administrativu Cristo-Rei, Munisipiu Dili, neebe moris ho faan fatuk ahu-ruin hodi sustenta moris, husu governu karik bandu labele hili fatuk ahu-ruin ba faan, hatudu took fali servisu seluk ruma ba sira atu nunee bele halo hodi hetan osan hodi sustenta nesesidade uma laran.
Kestaun nee hatoo husi negosiante fatuk ahu-ruin, Maria Soares Ribeiro ba STL iha Aldeia Manu-Meta, Suku Bidau Santana, Segunda (25/5/2026).
Maria nuudar feto faluk dehan, nia parte durante nee faan ahu-ruin hodi sustenta moris maibe teki-teki governu hasai rezolusaun hodi bandu labele faan fatuk tasi halo nia sente triste wainhira rona governu hasai desizaun ida nee. Governu bandu ho razaun estraga ambiente tasi, maibe governu rasik la kria fali negosiu seluk hodi suporta povu kiik buka osan sustenta nesesidade moris loron-loron, estadu ka governu hatene buat hotu-hotu bandu no duni sai deit nia povu. Karik prinsipiu ida nee mak governu ida nee halo povu kiik mak sei sai vitima ba ukun-aan ida nee no sai mos bainaka ba nia rain rasik, ukun nain sira goza iha sofrementu povu nia leet.
Inan faluk nee fundamenta, nia hahu faan fatuk tasi ho kolega nain 3 sira hamutuk nain 4 husi tinan 2002, maibe nia kolega nain ida mate ona agora hela sira nain 3 kontinua faan.
“Durante sira faan fatuk sempre hetan intervensaun makaas husi governu liu husi polisia katak, bandu sira labele faan tanba nee dalaruma fatuk ahu-ruin neebe hili rai hamutuk polisia sira mai hadau hotu lori fakar tiha ba tasi laran, maibe liu tiha ami hili fila-fali tanba kestaun nesesidade moris obriga, se karik la faan hodi saida mak hetan osan sustenta moris, governu nunka fo deit ba ita, nunka ba tuur iha Palasiu Governu tane liman ba governu husu osan,” katak Maria.
Komunidade orijin husi Suku Maulau, Postu Maubisse, Munisipiu Ainaro nee dehan, fatuk neebe nia faan durante nee ense ba karun foos fatin 20 kilo faan ba US$ 15.00 kada saka, maibe agora ema la dun sosa kompara ho tinan hirak liu ba sei sosa netik. Agora dalaruma loron 4 ka 5 foin sosa netik neebe auguenta sustenta moris deit maibe atu dehan loron ida hetan lukru hirak la bele prediksi. Maske nunee nia faan nafatin tanba la iha tan alternativa seluk atu halo hetan osan, tan nee sekarik governu bandu fo took fali alternativa saida mai nia povu kiik halo hodi sustenta moris.
“Hau deit idade 80 resin ona too agora seidauk hetan osan subsidiu idosu, tanba ba trata dokumentu maibe birokrasia naruk ho nunee susar ba nia atu trata dokumentu hodi hetan osan subsidiu terseriedade, nee mak governu bandu labele faan fatuk tasi, nia kontinua faan,” nia fundamenta.
Komunidade nee komprimente nia sei faan nafatin fatuk ahu-ruin hodi sustente nesesidade uma laran enkuantu nia sei moris maske ho idade neebe abansadu ona.
(ger)
