ERMERA, STLTIMORLESTE.com – Durante Institutu Nasionál Kombate HIV-SIDA (INCIDA) halao sensibilizasaun hodi hasae konhesimentu komunidade nian ba virus HIV iha Suku Fatuquero, Postu Administrativu Railaku, Munisipiu Ermera.
Nia dehan, juventude barak seidauk iha konhesimentu diak ba prevensaun HIV-SIDA, tanba nee dadus Ministeriu Saude (MS) kontinua aas.
“Ita nia atividade hanesan baibain, ita halao hela sensibilizasaun iha suku-suku no ohin iha Suku Fatuquero, ita nia objetivu ida deit, ita hakarak hasae konhesimentu ita nian komunidade sira ligadu ho problema ho HIV-SIDA nian,” hatete Diretora Nasional Promosaun Prevensaun no Komunikasaun iha INCIDA, Angelica Soares da Costa Oliveira ba jornalista sira iha Suku Fatuquero, Postu Administrativu Railaku, Munisipiu Ermera, Tersa (26/05/2026).
Nia esplika, iha Suku Fatuquero komunidade preokupa tebes ho asaun prevensaun, liu-liu ligadu ho moras hadaet liu husi relasaun seksual sira nee.
“Ita koalia liga liu ba prevensaun nian, entaun iha nee presiza hasae konhesimentu komunidade sira nian, mezmu iha parte balun presiza kontrola aan, maibe iha parte balun ita tenke koalia prevensaun, tanba maluk balun barak neebe moris livre sira la hatene oinsa mak atu kontrola aan, entaun ita labele kontrola ema ida pur ida, entaun maneira prevensaun neebe diak mak ita koalia ba sira oinsa mak perjevatifu,” nia deklara.
Iha fatin hanesan, Xefe Suku Fatuquero, Leoncia Trindade informa, baibain komunidade akompanha husi media deit, maibe ohin INCIDA tun direta hodi fahe informasaun konaba virus HIV, ida nee importante tebes ba komunidade Fatuquero.
“Relevante mai kedas too iha hau nia Suku Fatuquero no hau nia populasaun rona direita, tanba ita hatene katak moras HIV-SIDA nee laos buat foun iha Timor, maibe iha mundu ita hotu akompanha nia oho ema barak ona, ho loron ohin hau senti diak los hau nia komunidade sira mos partisipa masimu no bele hadook aan husi situasaun ida nee,” nia informa.
Nia deklara, INCIDA tun duni mai suku sira hodi halao sensibilizasaun kona-ba virus HIV nee ba komunidade Fatuquero, sira laos asesu deit iha media maibe INCIDA tun kedas mai baze para fahe informasaun ba populasaun direta no sira bele hatene duni katak moras HIV-SIDA nee la diak duni.
“Hau nuudar autoridade no hau rona direita no ida nee hau nia servisu, hau sei fahe informasaun ba hau nia populasaun sira hotu, hau fiar katak ohin sira neebe mai bele fahe informasaun nee ba ema liu nain 10 no ema 20, tanba sira ohin mai hela ho vizinhu no sira mos iha familia, ita sei fahe informasaun nee ba malu,” nia koalia.
Entretantu dadus neebe Sentru Saude Munisipiu Ermera relata katak, Munisipiu Ermera detekta nain 53 no husi numeru Postu Administrativu Railaku nain 8 nomos husi nee iha nain hitu (7) mak lakon vida.
(jen)
