DILI, STLTIMORLESTE.com – Komisaun C neebe trata Asuntu Finansas Publikas iha Parlamentu Nasional (PN) apoiu polítika husi Autoridade Munisipiu Dili neebe iha loron 25 Maiu hahu aplika tasa ba estasionamentu neebe estabelese ona iha fatin turizmu relijozu Cristo Rei.
Prezidente Komisaun C, Deputada Cedelizia Faria dos Santos hateten, Komisaun C apoiu aplikasaun tasa ba estasionamentu iha Cristo Rei.
Tuir nia, Autoridade Munisipiu Dili tenki aplika duni tasa ba fatin sira hodi kontribui reseita ba kofre estadu, tanba Timor Leste ukun aan tinan 24 ona reseita neebe kada tinan estadu rekolha seidauk bele sustenta salariu no vensimentu.
“Ami nia rekomendasaun dala barak ami apoiu desizaun ida nee, tanba depois de ita ukun aan husi tinan 2002 mai too agora tempu ona ba ita atu kontribui reseita ba estadu”, hatete nia ba jornalista sira, hafoin remata audiensia ho membru komisaun iha PN, Tersa (26/05/2026).
Nia dehan, Komisaun C sei bolu Autoridade Munisipiu Dili hodi diskute montante orsamentu neebe aplika ba estasionamentu sira, serake sira foti desizaun nee bazeia ba rendimentu neebe populasaun sira hetan ga lae.
“Maibe kona-ba montante nee ami Komisaun C sei bolu Prezidente Autoridade Munisipiu Dili atu haree fila fali tanba saida mak aplika montante UU$ 1 too UU$10, serake ida nee tuir ona reseita neebe ita nia komunidade sira hetan kada loron ga lae,” dehan Deputada.
Nia mos dehan, aplikasaun tasa ba estasionamentu sira nee sei la fo implikasaun ba vizitante iha fatin turizmu relijozu nee, no iha fatin seluk ba komunidade sira atu vizita.
“Hau hanoin atu masimu ga lae nee, iha Timor nee tasi laos deit iha Cristo Rei, tasi barak-barak no fila fali ba maluk sira idak-idak ninia desizaun, se nia hakara ba Cristo Rei regras mak nee, nia tenki kontribui, se lakohi bele ba fatin seluk neebe seidauk aplika tasa,” dehan esplika.
Entretantu, molok nee Autoridade Munisipiu Dili (AMD) liu husi konta facebook ofisial anunsiu ona ba publika katak iha loron segunda feira (25/05) Autoridade Munisipiu Dili hahu aplika tasa ba estasionamentu iha fatin turizmu relijozu Cristo Rei.
“Autoridade Munisipiu Dili informa ba komunidade tomak katak servisu estasionamentu iha zona Cristo Rei sei hahu funsiona ofisialmente husi Segunda-feira, loron 25 fulan Maiu tinan 2026, tuir organizasaun no regras neebe vigora,” haktuir nota komunikadu imprensa neebe STL asesu husi pajina facebook ofisial AMD, segunda (25/05/2026).
Autoridade Munisipiu Dili aplika Medida ida atu hadia ordenamentu trifiku, organiza fatin estasionamentu no garante seguransa ba komunidade no utilizador sira iha area turismu Cristo Rei.
Tan nee husu komunidade sira neebe Kada loron vizita ba iha fatin turistiku nee atu ho koopera ho regulamentu neebe iha.
“Autoridade Munisipiu Díli husu ba komunidade hotu atu koopera no kumpri regras estasionamentu neebe determina ona hodi hametin ordem iha zona Cristo Rei.Obrigadu ba ita boot sira nia atensaun no kooperasaun diak,”
Entretantu tasa neebe Autoridade Munisipiu Dili aplika ba iha estasionamentu Cristo Rei mak hanesan ba transporte sira hanesan motor $ 0.50 Centavos/Kada Oras, se para husi dader tuku 08h00 to 17h00 mak sei selu koima US$ 5.00,
Aleinde nee transporte hanesan kareta US$ 1.00/Kada Oras, se estasiona kareta hahu husi lorokraik tuku 17h00 to kalan 22h00 mak sei selu koima US$ 10.00.
(alb)
