DILI, STLTIMORLESTE.com – Embaixador Timor Leste ba Korea, Antonio Benevides relata servisu neebe halao durante nee iha Korea ba Prezidente Republika (PR), Jose Ramos Horta.
Binhira remata hasoru malu, Embaixador Timor Leste ba Korea Antonio Benevides ba jornalista iha Palasiu Prezidensial Nicolau Lobato Bairo Pite, Tersa (26/06/2026) hatete, ohin mai hasoru malu ho Prezidente Republika partila imformasaun konaba serbisu neebe embaixador halo iha Korea tinan ida ho balun iha neeba ba Prezidente Republika Jose Ramos Horta.
“Mai relata deit serbisu neebe hau halo nomos esplika oituan planu neebe mak atu halo ba tinan oin nia, ida nee deit mak hau hatoo ba nain Prezidente.” dehan Embaixador TL ba Korea.
Embaixador dehan, fahe informasaun ba Prezidente konaba antes nia ba korea iha 2024 Outubru, Prezidente Republika mos instrusaun ba Embaixador atu hakbesik aan ba Universidade sira.
“Antes hau ba Korea iha 2024 Outubru, Prezidente fo instrusaun ba hau para atu hakbesik aan ba iha Universidade sira iha Korea, nia bele ajuda partilha fahe informasaun ba estudante sira iha Koreano sira, entau hau halo hau nia servisu ida nee hau mai hatoo ba nain Prezidente konaba ida nee, nomos servisu hamutuk ho adidu trabalhu sira SEFOPE nian hodi haree ba ita nia maluk traballador sira buat sira nee mak hau relata ba Prezidente,” dehan Embaixador.
Embaixador hatete, nia mos informa ba Prezidente Republika konaba vizita Ministru Negosiu Estranjeiru neebe sei vizita Korea.
“Hau fahe mos imformasaun ba Prezidente konaba vizita tempu badak senhor exelensia Ministru Negosiu Estranjeiru atu ba vizita Korea, hau fahe imformasaun ida nee nomos koalia konaba planu karik iha posiblidade senhor Prezidente Republika mos sei ba Korea,” katak embaixador.
Iha hasoru malu nee Prezidente Republika Jose Ramos Horta husu atu halo diskusaun sira nee ho kanal sira neebe mak liga ho assuntu ida nee.
Prezidente mos informa ba Embaixador katak, sei iha tempu barak sei kontaktu ou liga ba amigo Prezidente nia iha Korea atu serbisu hamutuk ho embaixada.
(eme)
