ERMERA, STLTIMORLESTE.com Daudaun nee reazente teste ba moras HIV stok menus ou la sufisente atu lori sai mai iha atividade sosializasaun virus HIV nia iha Munisipiu Ermera.
Nia dehan, kona-ba reazente teste ba HIV stok lama nee sei iha, maibe ida nee asegura deit iha Sentru Saude Ermera bazeia ba pasiente neebe hetan sintomas mak foin halo teste.
“Stok reazente nee menus entaun ita labele lori sai mai atividade sensibilizasaun, entaun ita hein ema neebe volontariu ba tes raan mak ita foin halo teste,” hatete Coordenador Programa HIV/MHRS, Servisu Saude Munisipiu Ermera, Valente Arcanjo Belo ba jornalista sira iha Suku Matata, Postu Administrativu Railaku, Munisipiu Ermera, Kuarta (27/05/2026).
Nia esplika, reazente teste nee la sufisente atu lori mai halo teste iha fatin atividade, espera katak semana oin reazente nee foin Tama.
Iha fatin ketak, Xefe Departamentu Program Saude iha Munisipiu Ermera, Liborio Martins informa, atu identifika sedu moras HIV-SIDA mak tenke halo teste ba moras HIV.
“Ami husu ba inan-aman no hotu-hotu tenke hakbesik aan ba fasilidade saude liu-liu ba sentru saude karik iha akontese moras hadaet liu husi relasaun seksual,” nia deklara.
Nia hatutan, iha Sentru Saude Munisipiu Ermera iha ona Laboratoriu no iha mos mediku no Coordenador Programa HIV/MHRS mos iha fatin hein komunidade sira bele halo teste ba HIV no moras seluk, maibe agora nee reazente laiha atu lori mai aktividade sensibilizasaun virus HIV.
“Ami halo ona teste jeral ba ita nia juventude sira neebe hakatak volontariumente no inan isin rua sira mos tes, tuir loloos ohin ami ho ami nia ekipa Laboratoriu para atu halo teste, maibe tan deit ita nia reazente kuaze fulan ida resin sasan laiha, entaun ami labele halo teste ba ita hotu-hotu, maibe ita iha dalan wainhira halo teste hotu -hotu ba konsulta ho doutor sira, karik ema nee indika duni ba pozitivu entaun nia tenke hetan ona tratamemtu no hemu aimoruk ARV,” nia koalia.
Nunee Prezidente Institutu Nasionál Kombate HIV-SIDA (INCIDA), Daniel Marcal hatete, Segunda, Tersa no Kuarta INCIDA halao sosializasaun iha Suku Railaku, Suku Fatuquero nomos Suku Matata, ekipamentus ba reazente teste ba HIV laiha, parte Sentru Saude Munisipiu Ermera preokupa hela ida nee.
“Tanba nee ba oin nee oinsa, tan ita teste ran mak bele detekta ema nee konaba virus HIV, so dalan ida mak tes ran duni, neebe importante los, ita atu heree fila ba oin nee parte Saude no INCIDA haree took planu ba oin sei koalia ho PM para haree too, agora nee atuasiasimu tes nee barak ona, entaun kondisaun ita nia pereparasaun ba buat ida reazente hodi teste nee tenke iha, sei lae komunidade prontu atu ba tes ran, maibe reazente laiha,” nia afirma.
(jen)
