DILI, STLTIMORLESTE.com – Akademiku husu atu inan sira neebe hasoru Violensia Domestika (VD) labele tauk hatoo keixa, tanba ohin loron krime VD hanesan krime publiku.
“Hau hanoin tempu ona atu inan sira neebe hasoru violensia iha familia, labele tauk hatoo keixa, tanba iha ona lei atu regula sira neebe halo krime VD hasoru inan sira,” dehan Akademiku UNTL, Rafael de Jesus ba STL iha Dili, Kuarta (27/05/2026).
Nia hatutan, iha lei regula aktu VD, iha tempu uluk ema konsidera VD problema uma laran, maibe ohin loron VD problema publiku, se deit mak problema vizinhu no ema ruma haree tenke hatoo keixa.
Iha fatin ketak, Jurista Sergio Dias Quintas dehan, krime VD kontinua akontese aas, tanba feto barak sei moris dependensia liu ba mane.
“Krime VD kontinua akontese ho numeru aas, tanba feto maluk sira neebe sai vitima dala barak depende liu ba mane em termos ekonomia,” dehan Sergio.
Nia hatutan, tanba nee mak governu tenki fo atensaun ba vida moris feto maluk sira, tanba wainhira problema vulnerabilidade nafatin iha feto nia kabas, ka moris depende liu ba mane, problema violensia domestika sei kontinua sae.
Sublina, presiza mos fo sensibilisaun ba komunidade katak, VD nee krime publiku ba sei deit hatene hatene tenki hatoo keixa ba polisia para kaer mane neebe baku nia feen, tanba nee laos problema bikan ho kanura mak baku malu maibe nee krime, ho forma sira nee bele reduz krime VD.
(ter)
