ERMERA, STLTIMORLESTE.com – Polisia Nasional Timor Leste (PNTL) liu husi Komandante PNTL Munisipiu Ermera sobu duni fatin prostituisaun iha Kapital Gleno.
Nia dehan, iha Gleno Ermera fatin prostituisaun iha fatin tolu (3) neebe PNTL sobu iha fulan kotuk no daudaun nee aprezenta ona ba Ministeriu Publiku (MP).
“Kapital Gleno ita sobu ona fatin prostituisaun tolu no ema nain 16 neebe mak ita foti,” hatete Komandante PNTL Munisipiu Ermera, Superintendent Xefe, Ludgerio Picansio Madeira Lay ba jornalista sira iha Suku Tokoluli, Kinta (28/05/2026).
Nia teknik, ba sira neebe halo atividade prostituisaun iha Munisipiu Ermera, PNTL foti no sobu fatin prostituisaun nee, no prosesu investigasaun depois aprezenta ona ba Ministeriu Publiku.
“Ita halo prosesu ba sira neebe hanesan uma nain ho ema sira neebe hanesan fasilita sira prosesu nomos agora iha MP,” nia esplika.
Nia informa, iha fatin balun sira loke salon iha kotuk sira halao atividade prostituisaun.
“Ita bele ba foti imajen maibe ita tenke hetan autorizasaun husi nain ba prosesu sira nee, ami labele fo sai,” nia koalia.
Iha fatin ketak, iha Autoridade Lokal balun iha Railaku neebe lakohi temi naran esplika katak, relasaun ho informasaun neebe STL ho RTTL fo sai katak, deskonfia Merkadu Railaku harii duni fatin prostituisaun, maibe nee akontese iha tinan 2024 no 2025, daudaun nee laiha tanba sobu ona.
“Ita nia administrador koalia nee los, komu nia laiha dadus neebe kompletu atu koalia ho media, maibe fatin prostituisaun iha merkadu Railaku nee iha duni, ema halao duni atividade seksu livre, maibe akontese nee iha tinan 2024 no 2025, agora laiha ona tanba fatin nee sobu ona, depois fatin prostituisaun ida tan iha Gleno maibe ita nia PNTL sobu ona foin daudaun nee,” nia afirma.
(jen)
