DILI, STLTIMORLESTE.com – Eskola nivel pre eskolar no ensinu baziku hitu iha Munisipiu Lautem tau ona iha planu, hodi bele halo konstrusaun foun.
Lia hirak nee hatoo husi Diretor Servisu Edukasaun Munisípiu Lautem, Anibal Fernandes ba STL liu husi telefone, Kinta nee (28/05/2026).
“Ita iha eskola neebe mak la diak liu nee maka eskola hitu, nee duni iha projetu hitu, eskola nee husi ME mak halo, nee mak hitu nee, nee halo konstrusaun foun ba tinan ida nee, tanba ninia kondisaun eskola hitu nee aat liu ona, nee mak ita atu halo konstrusaun foun ba eskola hirak nee, eskola hitu nee nibel pre eskolar no ensinu baziku,” nia informa.
Iha fatin seluk Diretor Servisu Edukasaun Munisipiu Bobonaro, Miguel Freitas katak, Ministeriu Edukasaun (ME) liu husi Servisu Edukasaun Munisipiu Bobonaro kontinua identifika kondisaun infraestrutura eskola balun neebe presiza halo konstrusaun foun no reabilitasaun.
“Iha tinan kotuk ami identifika ona ita nian ensinu pre eskolar hamutuk 13, husi numeru nee ualu halo konstruksaun foun no lima reabilitasaun, agora ba tinan ida nee ami nafatin identifika ita nian infraestrutura eskola, atu nunee ita bele hatene lo-loos katak, hira mak tama ba konstrusaun foun no hira ba reabilitasaun ninia,” nia deklara.
Miguel akresenta, tinan ida nee SEM Bobonaro nafatin identifika kondisaun infraestrutura eskola, maibe tanba daudaun nee udan hela, depois mak ami sei halo kontinuasaun, ita nian eskola 13 nee pre eskolar hotu,” nia dehan.
Nia dehan, iha Munisipiu Bobonaro pre eskolar balun sei didin ho bebak no kalen, ida nee hanesan dezafiu ida ba sira, tanba pre eskolar sira nee didin ho bebak, tanba nee balun atu halo konstrusaun foun no ba reabilitasaun ninia.
(jac)
