DILI, STLTIMORLESTE.com – Eskola balun iha Munisípiu Lautem too agora sei menus meza no kadeira, maibe husi SEM Lautem hatoo ona ba Ministériu Edukasaun Nasional.
“Ita nian eskola balun menus meza no kadeira, liu-liu ita nian edifisiu sira neebe PNDS halo, nee mak meza no kadeira laiha, maibe ita husu ba Ministériu atu bele fornese meza no kadeira ba ita nian eskola neebe sei menus fasilidade,” dehan Diretor Servisu Edukasaun Munisípiu Lautem, Anibal Fernandes ba STL liu husi telefone, Kinta nee (28/05/2026).
Iha fatin seluk, Cesarina Correia Guterres, nuudar Superintendente Edukasaun Munisipiu Dili afirma, dadus provizariu daudaun nee eskola lima (5) neebe mak ohin mensiona nee mak sei menus meza no kadeira ba estudantes sira.
“Hau hanoin kona-ba eskola neebe menus meza no kadeira nee, ita nian dadus provizoriu eskola neebe mak sei menus kadeira meza mak hanesan EPE Avo Ana Irene Metinaro, EPE Benunuc Metinaro, EPE Acanunu Hera ho EBF 12 de Outubro, kadeira meza EBC Manleuana mos sei menus,” dehan nia.
Nia hatutan, eskola hirak neebe ohin mensiona nee, oinsa mak ba oin atu fo apoiu meza no kadeira, hodi nunee bele fasilita estudantes sira uza ba prosesu ensinu aprendizajen iha sala de aula.
Nunee mos Diretor Servisu Edukasaun Munisípiu Likisa, Julio da Silva hatete, eskola balun iha Munisipiu Likisa sei menus meza no kadeira ba estudantes sira, nuudar Diretor Edukasaun sempre halo pedidu ba iha parte nasional, atu nunee bele fo apoiu fasilidade meza no kadeira ba eskola sira.
“Ita nian eskola balun iha Munisipiu Likisa sei menus meza no kadeira ba estudantes sira, nuudar Diretor Edukasaun sempre halo pedidu ba iha parte nasional hodi bele fo apoiu fasilidade meza no kadeira ba eskola sira,” nia informa.
(jac)
