DILI, STLTIMORLESTE.com – Kondisaun finanseiru familia nian neebe kbiit laek kria fali impaktu boot ba labarik sira iha sidade Díli neebe kontinua faan sasan hodi ajuda sustenta ekonomia familia. Hodi hetan mos preokupasaun makaas husi parte akademika sira tanba kestaun nee nuudar ameasa boot ba kualidade rekursu umanu no futuru edukasaun nian iha Timor Leste (TL).
Tuir observasaun jornalista STL iha terrenu haree katak, labarik sira nee faan produtu oioin hanesan manutolun, krupuk, dosi, bee moos, aifuan, pulsa no seluk tan. Sira lao lemo lemo iha motor no karreta leet hodi ofrese sira nia sasan ba pasajeiru sira, liuliu iha oras neebe transportes macet.
Situasaun neebe labarik sira infrenta hamosu preokupasaun boot husi parte oioin. Fator prinsipal neebe lori labarik sira ba estrada mak tanba kbiit finanseiru família nian bazeia deit ba rendimentu kiik. Oan sira sente fali responsabilidade hodi buka osan hodi sosa aihan ka uza mos ba sira nia nesesidade eskola nian.
Maski balu kontinua eskola iha dader, maibe iha loraik sira tenke ba fali estrada ninin. Kondisaun nee fo impaktu boot ba sira nia tempu estuda no dezenvolvimentu fiziku no mental nuudar labarik.
Estrada ninin nuudar fatin neebe la seguru ba labarik sira. Sira hasoru risku boot ba asidente tranzitu anin no foer neebe bele lori moras no mos risku ba violensia oioin iha fatin publiku. Problema nee presiza hetan atensaun seriu no labele husik naruk husi parte hotu hotu.
Haree ba realidade nee Observador Politika, Pedro da Costa konsideira katak, prezensa labarik sira nian iha estrada nuudar espalha husi falhansu poder ezekutivu ka governu nian hodi kria kampu servisu no hamenus dezigualdade sosial iha sidade boot sira.
Tuir analizas husi Pedro Governu dala barak liu foka ba dezenvolvimentu fiziku ka infraestrutura boot, hodi haluha tiha investimentu ba dezenvolvimentu umanu no protesaun sosial neebe bazeia ba faktu iha terrenu.
“Osan Estadu nian kada tinan gasta barak liu ba kustu kargu politiku no projetu boot, maibe olokasaun orsamentu bee mos, nutrisaun no kbiit finanseiru ba família funeravel sira nafatin kiik. ida nee hatudu katak, prioridade politika Governu nian seidauk hateke ba povu kiik,”dehan Pedro ba STL, Sesta (29/05/2026).
Observador Politika nee sublina katak, labele uza kampanha politika deit hodi promete moris diak ba povu, maibe tenke hatudu fali kbiit liuhusi ezekusaun programa neebe bele muda duni realidade moris hodi rezolve netik problema labarik sira nian iha sidade Díli.
Atu duni dezafiu sira nee nia husu ba Governu atu laos deit halo operasaun hodi duni sai labarik sira husi estrada, maibe tenke iha politika publika neebe integradu no klean hanesan Governu presiza kria programa apoiu ekonomia neebe mos fo baze ba familia sira neebe iha lina kiak laran, nunee inan -aman labele fo fali todan ba oan sira.
(car)
