DILI, STLTIMORLESTE.com – Inspetor neebe mak Tribunal Rekursu (TR) rekruta hodi halo inspesaun ba servisu Juiz sira iha Tribunal Judisial Primeira Instansia Dili, Baukau, Suai no Oe-kussi, inklui Tribunal Rekursu finaliza ona nia servisu, no relatoriu submete ona ba Prezidente TR.
“Inspetor relata tiha mai ona, nia relata kada faze deit, liu-liu kona-ba servisu Juiz sira nia, orsida membru konselhu mak sei distribui ba Sekretaria Konselhu halo fali lista ida, nain hira hodi submete ba konselhu para konselhu atu omologa rezultadu nee,” dehan Prezidente Tribunal Rekursu, Afonso Carmona ba jornalista sira iha Kaikoli, Sesta (29/05/2026).
Nia hatutan, agora daudaun asina uluk kuadru lei, nunee fo biban hodi loke vaga ba promosaun Juiz sira, kuandu Juiz sira hira mak liu ka hira mak la liu para TR bele hatene ona.
Nia esplika, kuadru legal nee atu define mos ba Juiz sira neebe aban bainrua promove ona ba segunda klase, no primeira klase sira bele tuir ona salariu.
Nia afirma, ita iha konkluzaun katak, ita bele halo promosaun, maibe tanba liga ho lei dehan tenke iha kuadru, entaun tenke asina karta ida para bele iha fiksu ba iha vaga nee.
Aktual Prezidente TR dehan, kestaun nee sei deside mos husi Konselhu Superior Majistratura Judisiaria. Tanba nee, se karik semana ida nee sira asina, entaun semana oin bele koalia konaba promosaun. Tanba primeiru tenke ser iha vaga ida ho orsamentu neebe mak iha atu tau ba sira Juiz nia liu-liu sira nia salariu, atu sira promove ona sira iha ona vaga no sira mos iha ona salariu.
Carmona akresenta, konaba promosaun nee Komisaun Rekrutamentu Juiz sira nia servisu. No asina kuadru legal hodi loke vaga promosaun, la koalia se se mak promosaun nee kompetensia komisaun nian, maibe kuadru legal nee importante tanba iha vaga mak iha promosaun.
Nia reforsa, ba ida nee tuir lei konsellu mak determina se sira la foti desizaun nee buat nee lao. Tanba nee sira tenke ser aprova, tanba tuir lei nee konsellu mak termina, entaun kuandu sira mak la aprova mos problema hotu.
Iha sorin seluk, Akademiku Sebastiao dos Santos dehan, Juiz balu servisu tinan naruk ona, tanba nee presija duni halo promosaun ba sira.
“Hanoin Juiz balu servisu tinan naruk ona, presija duni halo promosaun ba sira atu aumenta sira nia kareira, maibe tenke tuir lei haruka,” dehan nia.
Hatutan tan, importante duni halo promosaun, maibe tenke liu husi faze ida, atu Juiz sira neebe merese duni halo promosaun maka bele halo promosaun.
(ter)
