BAUCAU, STLTIMORLESTE.com – Kareta ambulansia sapa matrikula 04-597 G. tula pasiente ida husi Munisipiu Lautem hetan asidente iha area Kampung Baru, Suku Seiçal, Postu Administrativu Baucau Vila, Munisipiu Baucau, tanba korta husi karau 4.
Pasiente nia laen kaben Jelito Monteneiro haktuir, kareta ambulansia refere tula nia feen kaben isin gravida neebe akompanha husi oan nain ida no parteira ida ho motorista neebe konduz kareta refere sai husi Raça, Postu Administrativu Lospalos, Munisipiu Lautem, iha tuku 00:00 kalan, no laen kaben akompanha ho motor iha kotuk. Durante viajem husi Lospalos tuir dalan ba Postu Administrativu Laga lao diak, maibe too iha area Suku Seiçal Postu Baucau Vila hetan asidente, tanba korta husi karau.
“Ami mai halai neineik karau nee hamutuk sia mak halai mai haat korta ida mak kareta sama tolu baku aan ba kareta nia isin vidru iha oin nakfera, janela supir nia sorin rahun,” Jelito Monteneiro hateten ba STL iha sala baixa HoREX Baucau, Sesta (29/05/2026)
Nia komenta, razaun transporta nia feen kaben husi Munisipiu Lautem ba halao tratamentu iha Hospital Rejional Eduardo Ximenes Baucau, tanba Sentru Saude Lospalos menus fasilidade.
Nia sublina, hafoin hetan asidente refere iha Seiçal parte ambulansia husi HoREX too kedas fatin kontinua evakua pasiente ba HoREX, enkuantu kareta refere para mantein iha fatin asidente, tanba parte oin rahun.
Iha fatin asidente komunidade Maria Julieta Correia haktuir, asidente refere akontese iha loron 29 Maiu 2026 purvolta tuku 03:00 madrugada iha neebe komunidade sira neebe hela iha area refere kuaze toba dukur, maibe derepente rona tarutu makaas iha estrada publiku diresaun, nunee halai sai hodi haree iha neebe kareta ambulansia refere soke karau ida mate fatin no kareta refere hetan estragus makaas iha parte oin.
“Polisia sira mai sukat ona karau mate nee ema nain laiha, entaun Polisia sira dudu tiha kareta nee mai iha nee tula karau mate nee ba kareta lori tiha ona ba,” Julieta aprezenta.
Nia akresenta, asidente refere parte Polisia Tranzitu Munisipiu Baucau too ona fatin akontesimentu halo identifikasaun ba karau refere, maibe laiha komunidade ida aprezenta aan nuudar nain ba karau, tanba nee parte Polisia asegura ona kareta ambulansia refere iha uma komunidade enkuantu karau neebe mate, parte Polisia tula ona ba edifisiu Komando Polisia Munisipiu Baucau.
Liga asuntu nee, STL tenta konfirma Komadante Komando Polisia Munisipiu Baucau, maibe seidauk hetan konfirmasaun, tanba relatoriu ba asidente refere husi Polisia Tranzitu seidauk too iha Komadante Munisipiu.
(tom)
