DILI, STLTIMORLESTE.com – Asesor Prinsipal Prezidensia Republika, Jeneral Reformado Lere Anan Timur hatete, jerasaun tuan presiza husik hela ezemplu diak ba jerasaun foun hodi lao tuir.
Asesor Prinsipal Prezidensia Republika, Jeneral Reformado Lere Anan Timur hatoo kestaun nee ba jornalista bainhira remata partisipa seminariu Nasional iha salaun Universidade da Paz, Sesta (29/05/2026) hatete, nasaun nee hetan ukun rasik aan husi ruin no ran, sakrifisiu, tanba nee husu jerasaun tuan sira husik hela ezemplu diak ba jerasaun foun sira nunee sira halo tuir hodi lori rai nee ba oin iha pas no unidade nia laran.
“Tenke fo ezemplu diak, se ita aman naok ten oan mos bele sai naok ten hotu, mais kuandu aman laos naok ten oan la naok, se aman sai badiu dor, oan mos sai badiu dor, mais aman mak dehan oan labele badiu oan labadiu duni,” dehan Jeneral Reformado Lere.
Iha biban nee Tenente Jeneral Reformado Lere hatete lider sira neebe harii nasaun ida nee ultima pajina ona lamai tan segundu faze tanba idade avansadu hotu ona.
“Tanbe nee Lider sira nee mak tenke halo refleksaun halo meditasaun serake desde 1975 too mai agora nee sa diak mak halo ba rai ida nee ba povu ida nee ba joven ida nee, agora ita iha era indepedensia, ita tama ona ba idade 80 anos sa diak mak hau husik hela ba jerasaun tuir mai nee,” katak Jeneral Reformado Lere.
Iha biban nee Lere mos husu estudante sira hotu nafatin halao estudu ho siblizado no edukasaun neebe diak nunee bele lori rai no povu nee ba oin.
Jeneral dehan, liafuan ida hanesan Universidade da UNPAZ nee labele iha forma deit labele tau naran Universidade da Paz depois sai nain fali ba konflitu, maibe eskola tantu iha Unpaz ka iha neebe deit eskola laos ba halo konflitu maibe eskola ba edukasaun ba sibilizasaun.
Nia hatutan tan katak iha uma mos inan aman hanoin oan sira oin sai siblizado maibe hatruka tan eskola atu aumenta kapasidade iha edukasaun nunee sai ema matenek no siblizado hodi lori povu no rai nee ba oin ho diak liu tan.
“Ba eskola para sai siblizado no edukadu nunee atu dezenvolve ita nia rai, rai ida neebe mak laiha sibilizado no laiha edukasaun bele riku too iha neebe mos kuitadu ba rai ida nee,” katak Lere.
Lere husu estudante hotu hotu promove pas iha idak idak nia fatin, no aumenta kapasidade iha eskola sira nunee bele aumenta skill diak hodi lori rai nee ba oin.
(eme)
