DILI, STLTIMORLESTE.com – Prezidente Republika (PR), Jose Ramos Horta sei hatoo diskursu espesial iha dialogu Iiss Shangri-La ba Dala 23 iha Singapura.
Iha loron Sesta (29/05/2026) Prezidente Republika, Jose Ramos Horta desloka ba Singapura atu partisipa iha Simeira Seguransa Azia nian ba dala 23, neebe konesidu ho naran Dialogu IISS Shangri-La. Prezidente sei iha Singapura husi loron 29 too loron 30 fulan Maiu tinan 2026.
Simeira nee rekonesidu nuudar forum primeiru ba dialogu defeza no seguransa iha rejiaun Azia-Pasifiku, halibur hamutuk ofisial senior sira governu nian, ministru defeza sira, no peritu seguransa sira husi mundu tomak hodi koalia kona-ba dezafiu krítiku sira ba seguransa rejional no internasional nian.
Bainhira too Iha loron 29 fulan-maiu, sei halao enkontru bilateral ho Prezidente Vietname, S.E. To Lam, ho objetivu atu hametin lasu diplomatiku no esplora area sira kooperasaun mutua.
Iha loron 30 fulan Maiu, Prezidente Ramos-Horta sei marka prezensa iha abertura Simeira Seguransa Azia ba dala 23. Sesaun plenaria sira sei kobre topiku sira kona-ba estratejia Estadus Unidus nian ba dame iha Indo-Pasífiku, prioridade sira iha paizajen estratejiku sira neebe muda iha Azia, perturbasaun seguransa marítima Azia nian, ameasa seguransa transrejional sira, hamutuk ho sesaun espesial sira neebe aborda jestaun ameasa sira ba estabilidade estratejiku, hasae seguransa litoral iha Azia no konstrusaun ba rezislensia defeza-industrial.
Prezidente Ramos-Horta sei hatoo Diskursu Espesial ida kona-ba mediasaun no rezolusaun konflitu iha mundu neebe fraturadu ohin loron, hodi fahe nia esperiensia pesoal serbisu hodi halibur parte sira neebe iha konflitu hamutuk iha esforsu ruma ba rezolusaun konflitu nian. Diskursu nee sei tuir ho sesaun pergunta no resposta neebe modera husi Sir John Chipman KCMG, Prezidente Ezekutivu husi Institutu Internasional ba Estudu Estratejiku (IISS).
“Timor-Leste mai laos deit atu aprende maibe mos atu kontribui—inspira husi ita-nia jornada rasik husi konflitu ba pas, defeza demokrasia, no transformasaun nasaun ida. Hau sente onradu atu fila fali mai iha Dialogu IISS Shangri-La hodi hatoo Diskursu Espesial kona-ba mediasaun konflitu iha ita-nia mundu neebe fraturadu. Dialogu ida-nee mak fatin ba debate kona-ba futuru estratejiku Asia nian,” deklara J. Ramos-Horta.
Nunee mos iha loron 30 fulan Maiu, Prezidente mos sei hasoru malu ho S.E. Florian Hahn, Ministru Estadu iha Gabinete Negosiu Estranjeiru Federal Republika Federal Alemana nian, hodi aprofunda relasaun bilateral entre Timor-Leste no Alemana. Timor-Leste espresa nia apoiu ba kandidatura Alemana nian ba kadeira la permanente iha Konsellu Seguransa Nasoens Unidas nian, enkuantu Alemana apoia Timor-Leste nia preparasaun ba prezidensia ASEAN nian iha tinan 2029.
Iha loron 31 fulan Maiu, Prezidente sei hasoru malu ho Sr. Richard Lloyd Parry, Editor Azia ba The Times no The Sunday Times, tuir ho reuniaun ho Sr. Zach Du Chao no Sra. Hong Nguyen Suong husi The Victory Group.
Iha parte loraik, Prezidente Ramos-Horta sei sai husi Singapura ba Jakarta, iha neebe nia sei hatoo palestra lideransa ba dala haat iha Eskola Governu ERIA iha loron 2 fulan-junu, molok fila hikas mai Dili iha loron 3 fulan Junhu tinan 2026.
(eme)
