DILI, STLTIMORLESTE.com – Komunidade sira iha Suku Ossohuna hulan deit pasiente ida ba suku Haekoni, Postu Administrativu Baguia, Munisipiu Baukau, hodi asesu ba ambulansia tanba estrada iha fatin refere kotu total.
Deputada Bankada Partidu Libertasaun Popular (PLP), Maria Angelina Sarmento husu Ministeriu Obras Publikas (MOP) atu noramliza estrada refere nunee bele fasilita komunidade sira hodi asesu ba sentru saude sira.
“Hau hakarak husu Ministru Obras Publikas atu halo intervensaun lalais ba estrada iha Suku Haekoni, Suku Osohunu no Suku Afaloikai iha Postu Baguia, tanba iha semana kotuk ema hulan deit pasiente husi mota sorin liu ba mota sorin atu bele asesu ba ambulansia multi funsaun, tanba kareta para dook tanba estrada kotu total,” hatete Deputada, Maria Angelina Sarmento iha ambitu debate orsamentu retifikativu iha PN, Segunda (01/06/2026).
Nia dehan, MOP presiza normaliza lalais estrada diresaun Ossohuna ba Haekoni, tanba ambulansia multi funsaun labele ultrapasa iha fatin refere hodi tula pasiente sira.
“Nebee se bele senhor Ministru favor ida halo kedas intervensaun rapida ba estrada refere,” dehan nia.
Hatan ba kestaun nee, Ministru Obras Publikas (MOP), Samuel Marcal rekonhese ponte iha Suku Ossohuna ba Suku Haekoni Postu Baguia Munisipiu Baucau kotu foun lalais nee, tanba kauza husi udan boot neebe akontese iha teritorriu laran.
Nia dehan, tekniku husi MOP oras nee halo hela lavantamentu ba dadus hodi prepara dezenhu molok avansa ba konstrusaun ponte foun.
“Tanba ponte nee laos ohin kotu aban ita ba halo fila kedas foun, maibe presiza halo estudu no dezenhu didiak depois mak ita avansa ba konstrusaun ponte foun,” hatan MOP.
Nia akrsenta liu tan katak, MOP fo ona orientasaun ba tekniku sira prepara dalan alternativu nunee bele fasilita populasaun sira oinsa bele asesu temporariu iha dalan nee.
“Hau mos akompanha hela husi media sosial, haree katak kestaun nee grave no iha fatin seluk tan, nebee ita hadia hela primeiru agora saida mak ita halo mak buka para halo alternativu neebe populasaun sira bele utitliza provizoriu nunee sira bele iha movimentu nunee MOP bele dezenu ponte neebe tau permanente baa ban bain rua ninia,” adianta nia.
(alb)
