DILI, STLTIMORLESTE.com – Oan sira nia futuru atu diak, nee responsabilidade 100% iha inan aman nia liman. Inan aman mak tenke servisu hakaas aan hodi tau matan bá oan sira nia moris loro-loron, kontrola sira iha dader, meudia, kalan no sa oras deit tenke kontrola hela deit sira, para bele hatene oan sira nia progresu.
Liafuan nee haktuir husi Diretora EBC Farol, Brigida Faustina Soares Guterres Coelho bá STL iha nia knaar fatin Farol, Segunda (01/06/2026).
Nia hatete, liu-liu mak hanesan bainhira husi parte eskola nian bolu xamada bá Inan aman sira, entaun inan aman enke koopera ho eskola halo diak.Tanba bainhira eskola bolu inan aman sIra, signifika iha buat ruma mak eskola bolu nee. Neebe Manorin sira nudar Inan aman iha eskola, presiza tulun mos husi Inan aman sira neebe iha uma para hamutuk hodi kontrola oan sira.
“Ita inan aman tenke koopera ho eskola halo diak ba, tanba bainhira eskola bolu inan aman sira, nee kala iha buat uma mak eskola bolu nee. Ami manorin sira nudar Inan aman iha eskola, Ami presiza tulun mos husi inan aman sira neebe iha uma para hamutuk hodi kontrola oan sira, liu-liu bá oan feto sira,” dehan nia.
Tuir nia katak, haree ba kazu barak neebe akontese iha rai laran labarik feto sira agora ho idade minoridade halo sira nia moris nee hanesan la normal tiha, isin rua sedu too balun soe subar tiha bebe. Hare ida nee nudar feto maluk no inan ida senti triste, maibe ida nee atu dehan saida, nee tanba buat ida ransu neemak halo labarik sira sai ladiak tiha. Neebe inan aman sira bainhira haree oan sira ransu haree lai, nia ransu ho se, bainhira nia sai nee, sai bá neebe no bainhira kalan la tama uma, nia bá neebe.
“Kalan kalan ita inan aman tenke kontrola, depois sai husi eskola ita tenke kontrola ohin materia saida no Professora semak tama. Tanba bainhira manorin nain sira hanorin, hamrik iha kuadru oin, sira sempre tau kedas loron no data. Sekuandu ravista livru laran mak laiha data no loron, nee labarik nee nia la tama aula. Inan aman tenke kontrola, parte rua neemak tenke servisu hamutuk para kontrola oan sira nia progresu iha eskola ida nee,” tenik nia.
Nia hatutan, inan aman labele senti kolen atu kontrola, tanba ida neemak inan aman nia vocasaun, neebe tenke halao ho responsabiliade. Forma familia nee vocasaun ida, hanesan sai profesor neemos vocasaun ida, Padre ho Madre mós vocasaun ida, neebe ida-idak tenke halao nia vocasaun ho diak.
Nunee mos Madre Joana Soares Ssps dehan, inan aman labele kolen atu kontrola no tau matan bá oan sira nia progresu lor-loron nian, tanba ida neemak responsabilidade Inan aman bá oan sira.
“Sai Inan aman laos deit bá servisu buka osan hodi fo han, fo hemu no fo eskola deit maibe presiza mos inan aman nia kontrola bá oan sira nia movimentu lor-loron nian. Liu husi kontrolu neemak inan aman sira bele hatene oan sira nia progresu no lalaok lor- loron, mais kuandu laiha kontrolu husi inan aman sira, tanba dehan kolen i dala ruma laiha tempu okupadu liu ho servisu. Tanba nee oan sira lao no halo tuir sira nia hakarak, entaun ikus akontese buat neebe familia sira la espera atu fo sala bá se. Tanba nee atu evita buat Sira nee hotu, presiza tebes Inan aman sira nia atensaun hodi halo kontrola bá oan sira nia movimentu lor-loron nian,” dehan nia.
Nia hatutan, inan aman labele senti kolen bá oan sira, tanba futuru oan sira nian nee responsabilidade tomak iha inan aman sira. Forma familia nee vocasaun ida, neebe tenke halao ho responsabilidade bá oan sira nia moris.
Nunaa mos Diretur Geral Eskola Nicolao Lobato, Rui Lopes hatete, oan sira nia futuru atu diak nee iha Inan aman Nia liman rasik. Tenke kontrola sira nia movimentu bá eskola too fila fali mai uma, no fatin neebe sira tama sai, atu nunee bele hatene tuir sira lao bá mai nee. Sekuandu laiha kontrola maka oan sira halo tuir sira nia hakarak, tanba laiha ema ida atu kontrola sira.
(dom)
