DILI, STLTIMORLESTE.com – Ministra Edukasaun, Dulce de Jesus Soares husu bá pesoal sira neebe servisu ba setor edukasaun atu servisu ho responsabilidade, hodi garante kualidade edukasaun ba estudante sira.
Liafuan nee Dulce haktuir bainhira sai inspetora ba serimónia isar bandeira nasional iha resintu Ministeriu Edukasaun Vila Verde, Segunda (01/06/2026).
Iha biban nee nia husu ba dirijente no funsionariu sira hotu atu mantein disiplina iha servisu fatin.
“Ba dirijente no funsionariu sira hotu atu mantein disiplina iha ita-boot sira-nia servisu fatin no momentu sira-neebe servisu hamutuk ho ema seluk iha eskola sira”, dehan Ministra nee.
Governante nee hatete, bainhira halao vizita ba eskola sira, keta haluha ajuda estudante sira iha literasia no numerasia tanba responsabilidade Ministeriu nian maka tenki garante estudante ho kualidade iha Timor-Leste.
Nunee mos Professor da Eskola Pre Sekundariu Sao José Operario Balide, Silverio da Costa katak, iha ambitu isar bandeira iha eskola nian, mensajen husi Diretur Eskola, Pe. Cesar Magno bá estudante no manorin nain sira mak husu bá estudante sira atu estuda makas, hodi nunee bele atinzi futuru TL nian, no sai sidadaun neebe diak bá estadu, familia nomos komunidade. Bá manorin nain sira atu sevisu makas liutan hodi hasae kualidade edukasaun iha rai doben nee.
(dom)
