DILI, STLTIMORLESTE.com – Ministeriu Edukasaun (ME) agradese ba Cambodia, tanba depois sai membru ASEAN, Timor Leste iha oportunidade ho nasaun membru ASEAN sira, no daudaun nee Cambodia parseira iha setor edukasaun.
“Enkontru ohin dader, primeiru ita agradese tanba depois ita membru ASEAN, ita iha oportunidade ho ita nian nasaun membru sira, agora daudaun ita iha Ministru Telekomunikasaun Transporte Cambodia nian mai vizita TL, hanesan ohin hatete ona katak, lansa ona programa ho Ministru Transporte no Telekomunikasaun,” dehan Ministra Edukasaun (ME), Dulce de Jesus Soares ba jornalista sira iha sala VIP ME, Tersa nee (02/06/2026).
ME Dulce hatutan, ohin dader iha enkontru nee koko explora posibilidade atu bele uza mos plataforma iha ME, liu-liu oinsa mak atu bele proteje dokumentus ME nian, hanesan sertifikadu estudantes sira nian, tanba plataforma nee fo posibilidade katak, kuandu plataforma nee uza, estudantes sira asesu edukasaun iha nasaun seluk la presiza atu mai legaliza sira nian sertifikadu iha ME, maibe bele uza deit plataforma ida nee.
“Dokumentus iha nee ba salva tiha ona, no iha komunikasaun ho nasaun seluk mos uza plataforma ida nee ou nasaun seluk neebe mak la uza liu husi ita nian embaixada sira forma iha nasaun sira nee ba, atu nunee ita nian estudantes sira kuandu imprimi dokumentus nee husi plataforma nee bele hetan rekonhesimentu, kuandu ME aplika ida nee,” nia dehan.
Nia akresenta, liu husi kooperasaun Ministeriu Transporte Telekomunikasaun TL, tanba sira uza ona, hanoin ida nee sei sai avansu boot ida iha servisu ME, nunee mos fasilita tebe-tebes, nesesidade estudantes sira nian. Iha tinan hirak ikus nee, parseria nee foka liu ba area sira tuir mai: Edukasaun Dijitál no Teknolojia: Parte rua diskute integrasaun TIK (Teknolojia Informasaun no Komunikasaun) iha sistema edukativu, inklui dijitalizasaun diploma eskolár ho kódigu QR (QR code) hodi garante seguransa no autentisidade. Memorandu Entendimentu (MoU): Iha fulan Abril 2024, Timor Leste no Kamboja asina ona Memorandu Entendimentu ida iha Phnom Penh, hodi hametin relasaun kooperasaun iha area Ensinu Superiór, Siénsia no formasaun kuadru rekursu umanu.
Kompete Inovasaun: Estudante Timor Leste mós hetan rekonhesimentu iha kompetisaun edukativu internasionál (hanesan Teach Me Award), ne’ebé apoiu mós husi Ministru Ambiente Kamboja. Timor Leste ho Kamboja iha duni kooperasaun forte iha edukasaun, liu-liu hafoin asina MoU iha Abril 2024 iha Phnom Penh.
Iha fatin hanesan, Chea Vandeth Minister of Post and Telecommunications dehan, ohin vizita husi Ministru Transporte Cambodia nian atu diskute oinsa implementasaun programa ida neebe horiseik lansa tiha ona ho Ministériu Transporte no Komunikasaun TL. Ohin mai vizita ME atu diskute posibilidade extende plataforma refere iha TL.
(jac)
