DILI, STLTIMORLESTE.com – Tinan nee Diresaun Nasional Edukasaun Inkluzivu Asaun Sosial Eskolar (DNEIASE) nafatin atualiza dadus estudantes defisiensia neebe asesu edukasaun formal iha nivel ensinu baziku.
Haktuir Diretor Nasional Edukasaun Inkluzivu Asaun Sosial Eskolar, Fernando Soares ba STL iha nia knaar fatin, Tersa nee (02/006/2026).
“Agora ita sei kontinua hela, bainhira hotu mak ita foin bele hatene ninia total estudantes defisiensia hira mak asesu ona edukasaun formal, nee duni atualizasaun dadus defisiensia nee ita halo hela, bainhira remata mak ita bele hatene lo-loos dadus nee hira. Munisipiu sira nee ita halo hotu, maibe ba eskola neebe mak ita identifika, ida nee mak uluk,” nia esplika.
Tuir nia, atualiza dadus defisiensia iha eskola nee prioridade ba iha nivel ensinu baziku ninia, nee duni atualiza dadus nee hahu kedas iha fulan Janeiru too ohin loron, nee seidauk hotu, tanba ninia prosesu sei kontinua lao.
“Agora daudaun ninia prosesu atualiza dadus nee sei lao hela, nunee ita seidauk hatene ninia dadus total lo-loos, tanba nee bainhira dadus nee ita atualiza hotu ona mak ita bele hatene ita nian estudantes defisiensia hira mak asesu ona edukasaun formal, liu-liu iha nivel ensinu baziku ninia,” tenik nia.
Entretantu, Diretor Servisu Edukasaun Munisípiu Ainaro, Patricio da Costa Magno dehan, kona-ba atualiza dadus estudantes defisiensia iha eskola nee husi ME nasional mak halo, maibe bainhira sira mai iha munisipiu nee sempre iha linha koordenasaun ba malu.
“Hau hanoin kona-ba atualiza dadus estudantes defisiensia iha eskola nee husi ME nasional mak halo, maibe bainhira sira mai iha munisipiu nee sempre iha linha koordenasaun ba malu, tanba liu husi atualiza dadus nee ita bele hatene estudantes defisiensia hira mak asesu ona edukasaun,” dehan nia.
(jac)
