QUELICAI ANTIGU, STLTIMORLESTE.com – Administrador Postu Administrativu (APA) Quelicai Antigu, Fransisco Matias Gusmão “Junior” husu ekipa fizkalizasaun husi Autoridade Munisipiu Baucau seriu ba implementasaun programa Uma Naroman ba Povu (UNP) faze daruak iha Suku Namanei, Postu Administrativu Quelicai Antigu, Munisipiu Baucau.
Autoridade Postu Quelicai Antigu nee hateten, hafoin simu mandatu husi Governu Sental lidera Postu Administrativu Quelicai Antigu iha fulan Dezembru 2024 no funsionamentu Administrativu Postu Quelicai Antigu hahu iha tinan 2025, nuudar Autoridade Postu halo kedas identifikasaun ba implementa projetu husi PNDS inklui Uma Naroman ba Povu (UNP) faze daruak nian, iha Suku sira pertense ba Postu Quelicai Antigu.
Nia sublina, mezmu projetu PNDS inklui UNP faze daruak neebe implementa antes simu mandatu, maibe Suku sira neebe pertense ba Postu Quelicai Antigu implementa projetu husi PNDS Autoridade Postu iha dever halo indentifikasaun, iha neebe nota maioria UNP faze daruak iha Suku Namanei seidauk entrega no la kompleta ho mobiliariu inklui uma balu seidauk hetan enerja eletrisidade.
Junior katak la kompleta mobiliariu inklui uma UNP neebe balu seidauk hetan enerja eletrisidade nee ekipa PNDS Suku, tekniku PNDS Postu no lideransa Suku nia responsabilidade, nunee remata prosesu indentifikasaun relata kedas pedidu ba Prezidente Autoridade Munisipiu Baucau atu orienta ekipa halo fizkalizasaun ba implementasaun UNP faze daruak iha Namanei, nunee bele hatene nia kauza no razaun, tanba durante Autoridade Postu halo identifikasaun ba UNP faze daruak iha Namanei ekipa iha Suku duun malu.
Nunee pedidu fizkalizasaun husi Autoridade Postu ba Autoridade Munisipiu Baucau orienta ona Ajensia Fizkalizasaun halo ona fizkalizasaun ba implementasaun UNP faze daruak iha Suku Namanei, maibe rezultadu husi fiskalizasaun refere seidauk relata ba Autoridade Postu Quelicai Antigu.
“Espera katak fiskalizasaun halo buat neebe diak para ita bele hatene kauza loloos ba problema nee iha neebe, se loos mak laiha sentidu responsabilidade no sentidu patriotizmu ba rai ida nee que halo jestuan ba programa sira nee failha tiha. Seriu i tenke aselera, tanba nee povu nia osan, laos lideransa komunitaria nia osan laos Autoridade nia osan, nee povu nia osan merese duni atu hetan atensaun husi Governante sira, tanba nee husu Ajensia Fizkalizasaun seriu para ita labele repete beibeik,” hateten APA Quelicai Antigu, Fransisco Matias Gusmão “Junior” ba STL iha nia knaar fatin Suku Afaça, Kuarta (03/06/2026).
Administrador Postu Quelicai Antigu nee dezafia Ajensia Fizkalizasaun husi Autoridade Munisipiu Baucau atu seriu ba implementasaun programa UNP faze daruak nian iha Namanei, nunee bele hatene kauza no razaun, tanba orsamentu neebe Governu aloka ba UNP objetivu atu ajuda familia vuneravel sira neebe laiha kbiit atu konstrui uma dignu, maibe implementasaun iha terrenu failha.
Tanba nee husu Ajensia Fizkalizasaun seriu ba implementasaun UNP refere, neebe nia orsamentu konstrusaun mai husi Orsamentu Jeral Estadu (OJE) neebe konsidera osan povu nian, laos lideransa komunitaria no Autoridade sira nia osan, nunee fizkalizasaun mak bele muda atetudi sira ba implementasaun programa sira tuir mai labele akontese tan hanesan atual.
“Ba hau hanesan Autoridade sente triste, tanba orsamentu nee kanaliza ba povu sira neebe forsa laiha atu halo uma, mak estadu tau osan halo sira nia uma, maibe ekipa PNDS Suku inklui PNDS Postu la dun iha vontade diak implementa programa nee, laiha komitmentu diak la kuida orsamentu ba ita nia povu, rezultadu ita nia povu sira uma nee la kompletu,” Fransisco Matias Gusmão “Junior” kestiona.
Too notisia nee publika STL seidauk hetan komfirmasaun ekipa fiskalizasaun husi Autoridade Munisipiu Baucau.
(tom)
