LAGA, STLTIMORLESTE.com – Kompanhia mineiru Estrella Resources hamutuk ho Autoridade Nasional Mineral (ANM) inaugura ona projetu bee moos neebe kanaliza liu husi kompanhia Manudare Unipessoal Lda iha Suku Ueru-Mata, Postu Administrativu Laga, Munisipiu Baucau.
Diretor Dezenvolvimentu Bisnis kompanhia Estrella Resources, Christopher J. Daws hateten, projeitu bee moos refere nuudar komitmentu no kompromisu parte kompanhia nian bainhira hahu halao atividade exprolasaun mineiru karkariu iha area juridiku Suku Ueru-Mata, iha neebe sai preokupasaun komunidade durante tinan naruk mak bee moos.
“Ida nee nuudar mehi komunidade nian neebe kompanhia kontribui ba komunidade iha Ueru-Mata,” hateten nia iha Ueru-Mata, Kuarta nee (03/06/2026).
Iha fatin hanesan, Xefe Suku Ueru-Mata, Sabino Martins agradese ba kompanhia Estrella Resources neebe apoiu ona konstrusaun no kanalizasaun bee moos ba komunidade sira iha Suku Ueru-Mata, neebe durante tinan naruk halerik ba bee moos.
“Komunidade ninia halerik liu husi kompanhia Estrella Resources responde ona, maibe seidauk sufisiente,” katak Sabino.
Enkuantu Diretor Ezekutivu ANM, David de Araújo hateten, kompanhia Estrella Resources hamutuk ho Murak Rai hetan lisensa husi ANM iha fulan Marsu 2025 hodi halo exprolasaun ba material mineru fatuk karkariu, nunee kanalizasaun bee moos nuudar komitmentu husi kompanhia neebe hanaran programa konteudu lokal hanesan kria empregu no programa dezenvolvementu komunitariu hanesan fasilita bee moos ba komunidade.
“Ida nee hanesan sira nia programa servisu no orsamentu neebe mak aprovadu husi ANM periodu tinan 2026” David Araújo relata.
Entretantu bee moos refere kanaliza husi bee matan Abarisi no Ufuira ho distansia Kilometru (Km) 3. 587 metrus hamutuk tanki rezervatoriu I litru 10.000, fahe tanki rezervatoriu II litru 20.000, distribui estasaun bee 10 iha neebe litru 5 segundu kada litru ba komunidade Suku Ueru-Mata ho total populasaun nain 821 husi Xefe Familia 217.
Projetu kanalizasaun bee moos nee responsabiliza husi Kompania Manudare, Unipesoal ho total orsamentu US$ 710.400 resin ba durasaun servisu besik fulan rua.
(tom)
