DILI, STLTIMORLESTE.com – Eis prizioneiru Cipinang husi Munisipiu Baucau husu Prezidente no Primeiru Ministru fo medalha por meritu ba sira, ho deklarasaun nee Prezidente Republika Jose Ramos Horta hatete, hein karta rekomendasaun.
Prezidente Republika Jose Ramos Horta hatoo kestaun nee ba jornalista sira iha Aeroportu Internasional Nicolau Lobato, Komoro, Kuarta nee (03/06/2026).
PR hatete, bainhira simu ona rekomendasaun husi ema ruma ka lider organizasaun ka eis Priozioneiru Cipinang sira nee Prezidente Prontu fo medalha Meritu tanba sira merese hetan.
“Klaru buat sira nee tenke ema ruma halo karta ruma ka sira rasik ou komisaun ruma tanba balun hau koinese, mais sira neebe hau la koinese nee ema tenke halo karta rekomendasaun sira neebe iha Cipinang tanba razaun politika klaru merese ita nia respeitu rekoinesementu,” dehan Prezidente Republika Jose Ramos Horta.
Prezidente hatete priozioneiru balun Prezidente rasik la koinese no balun koinese, tanba nee ida neebe mak Prezidente la koinese bele halo karta rekomendasaun nunee Xefe estadu bele ho kondekorasaun ho medalha Meritu.
“Hau lahatene sira hotu hotu hau hatene koinese mak Fernando Lasama sira lubuk ida iha neeba, I laos deit Cipinang deit maibe fatin seluk hanesan Francisco Branco, ho lider seluk iha fatin seluk prizaun mos, sira neebe seidauk hetan rekoinesementu tanba ita laiha Sistema ida maibe ema ruma halo rekomendasaun ou sira rasik hakerek pronto halo tanba sira merese,” dehan PR Horta.
Fon lalais Eis prizioneiru Cipinang husi Munisipiu Baucau husu Prezidente Republika (PR) Jose Ramos Horta no Primeiru Ministru (PM) Kay Rala Xanana Gusmão atu fo medalha por meritu ba sira.
Tuir Porta voz eis prizioneiru Domingos Savio Freitas aprezenta, relasiona luta libertasaun nasional durante tinan 24 hasoru invazasaun Indonezia iha Timor Leste mosu reasaun oin oin inklui asaltu Polisia Brimob Indonezia ho kareta Mercedes Hino ida iha area Mumana, Suku Abafala, Postu Administrativu Quelicai, Munisipiu Baucau, iha loron 31 Maiu 1997 rezulta Polisia Brimob nain 17 mate no nain 5 kanek enkuantu kareta refere no kilat, pistola rezulta mutuk iha fatin akontesimentu.
Nia sublina, insidente nee akontese lidera husi Sub-Xefe Estadu Maior David Alex “Daitula” iha neebe objetivu atu impede prosesu eleisaun Prezidensial neebe realiza iha loron 31 Maiu 1997, maibe iha insidente nee joven feto no mane hamutuk nain 125 husi Suku Baguai, Letemumo, Lacoliu, Uaitame, Abafala, Guruça, Macalaco, Laisorulai no Buibau sai vitima ba insidente refere, tanba joven feto no mane nain 21 husi total refere hetan kapturasaun husi militar Indonezia, iha neebe feto nain tolu, nain ida kastigu durante fulan tolu iha Dili no feto nain rua kastigu iha Quelicai enkuantu mane nain 18 kadeia tinan tolu iha Cipinang Indonezia hafoin hetan indultu iha tinan 1999.
“Iha okaziaun ida nee ami eis prizioneiru Cipinang rekomenda ba Prezidente Republika no Primeiru Ministru atu fo konsidera ami eis prizioneiru hamutuk ema nain 18 hetan amnestia internasional iha kadeia Cipinang ho medalha por meritu,” Porta voz eis prizioneiru.
Iha fatin hanesan, responsavel sub-kaixa kalvoari nuudar mos Vise Sekretariu membru OJETIL, João Bosco Ximenes “Maulesa” akresenta, kazu asaltu Polisia Brimob nain 17 mate, nain 5 kanek no kareta Mercedes Hino ida mutuk iha fatin akontesementu, nuudar susesu husi operasaun konjunta neebe involve husi frente armada no frente kladestina konsege marka istoria iha Mumana, Quelicai no vitima ba insidente refere kuaze joven barak, balu hetan kastigu tinan barak iha Cipinang Indonezia, maibe hafoin Timor ukun aan tinan 24 seidauk hetan kondekorasaun hanesan maluk seluk neebe hetan kondekorasaun medalha por meritu iha selebrasaun loron 20 Maiu tinan nee.
(eme)
