DILI, STLTIMORLESTE.com – Prezidente Republika (PR), Jose Ramos Horta halao enkontru ho Embaixador Argentina nao Rezidente, Gustavo Ricardo Coppa, hodi hametin asaun kooperasaun iha ambitu saude nian.
Bainhira remata halo enkontru, Embaixador Argentina nao Rezidente, Gustavo Ricardo Coppa ba jornalista sira iha Palasiu Prezidensial Nicolau Lobato, Bairo Pite, Sesta nee (05/06/2026) hatete, ohin halo enkontru ho Prezidente produtivu tebes hodi koalia kona-ba kooperasaun iha area ambitu saude.
“Ohin ami iha enkontru ida neebe produtivu tebes. Iha tinan kotuk 2025, Prezidente Ramos Horta hola inisiativa hodi halao asaun kooperasaun iha ambitu Saude nian. saida maka Argentina oferese iha area Saude nian, Prezidente Ramos Horta husu formasaun ba mediku Argentina sira, no governu Argentina fo lalais dezeju prezidente nian nee. Entaun agora, ho kolaborasaun ho prezidente, ita iha mediku Argentina sira neebe too iha Timor-Leste. Ami iha dekanu ida hosi Universidade Cordoba no profesor sira hosi Universidade Nasional Cordoba husi Argentina, too iha Dili fo formasaun mediku timoroan nian iha etapa dahuluk nee,” dehan Embaixador.
Embaixador Argentina dehan, sira too Dili sei halao formasaun kona-ba saude publika, saude família no kuidadu, no moras hadaet. Iha etapa dahuluk, no doutor sira sei iha Dili.
Iha etapa daruak, formasaun nee sei virtual, halao virtualmente, tuir pedidu hosi Prezidente, ba etapa datoluk, mediku timoroan sira sei iha esperiensia ida diretamente iha Argentina, neebe konserteza sei akontese durante tinan oin mai.
Embaixador hatete, nia iha Timor Leste tanba daudaun nee mediku Argentina sira too daudaun Timor Leste oinsa atu hametin liu tan kooperasaun Argentina ho Timor Leste iha area saude nia.
Nia hatete, durante hasoru malu ho Prezidente Republika diskute mos konaba kooperasaun ba futuru iha kampu desportu nian, “hanesan ita-boot sira hatene, Argentina nuudar nasaun ida neebe halo esportasaun ba jogador futebol sira, tanba nee iha dialogu ho Prezidente Ramos Horta ami mos diskute kona-ba ida nee, para Argentina bele oferese kooperasaun iha jogador futebol no treinador futebol sira mai Timor-Leste. Ida-nee mos sei aborda iha tinan oin, nunee Maromak hakarak, tinan oin hau sei fila fali mai iha nee hodi koalia fali ho ita-boot sira, maibe kona-ba kooperasaun no asuntu futebol nian,” katak nia.
Delegasaun mediku neebe daudaun atu mai nain hira? Hatan ba kestaun nee embaixador hatete, iha biban ida nee, delegasaun dahuluk kompostu husi mediku nain rua no dekanu husi Universidade Nasional Cordoba, profesor ida no dekanu, no mos xefe husi profesor sira iha Universidade Nasional Cordoba. Ida nee mak etapa dahuluk.
Mediku Argentina sira neebe too iha Domingu oin mai sei tuir formasaun, neebe sei halao husi Segunda too Sesta semana oin ho total oras 48 nia laran. Sira sei hetan formasaun hosi Universidade Nasional Cordoba, neebe sei entrega sertifikadu kursu nian ba mediku timoroan sira, neebe aprova ona kursu nee.
(eme)
