BAUCAU, STLTIMORLESTE.com – Konvite halo Koordenador eskola Ensinu Baziku Filial (EBF) primeiru segundu siklu Ueru-Mata, iha Postu Administrativu Laga, Munisipiu Baucau, abandona estudante segundu anu iha sala tempu aprendizajen nian.
EBF Ueru-Mata iha total estudante feto mane hamutuk nain 99, kompostu husi primeiru anu too sestu anu, responsabiliza husi profesores nain 5 no atual koordenador EBF Ueru-Mata, Jacinto Martins responsavel ba estudante segundu anu.
Maibe bainhira koordenador refere hetan komvite husi Autoridade Suku, Postu, Eskola Sentral inklui Edukasaun Munisipal ba asuntu enkontru nian, estudante segundu anu neebe nia responsabiliza tenke lakon materia prosesu aprendizajen, tanba laiha profesores atu substitui hodi hanorin estudante iha momentu neebe Koordenador sai ba partisipa enkontru tuir konvite neebe diriji.
“Profesores iha nee nain 6, hau nuudar koordenador hau mos hanorin sente la sufisiente, tanba konvite mai hela deit ita ba abandona labarik sira,” hateten Koordenador EBF Ueru-Mata Jacinto Martins ba jornalista sira iha EBF Ueru-Mata, Sesta (05/06/2026).
Materia prosesu aprendizajen nian neebe nia responsabiliza ba estudante segundu anu kuaze materia sira hotu.
Nia rekonhese, hahalok abandona estudante iha tempu prosesu aprendizajen nee viola estudante nia direitu, tanba lakon materia.
“Bainhira komvite laiha ita agradese, tanba ita hanorin ita nia oan sira bele sai matenek hadia ita nia rai, tanba nee husu edukasaun haree problema nee,” Koordenador Jacinto sujere.
Koordenador EBF Ueru-Mata nee husu Servisu Munisipal Edukasaun Baucau no Ministeiru Edukasaun atu koloka kargu koordenador responsabilidade ba asuntu administrasaun eskola nian, nunee bele atende deit asuntu administrasaun no atende komvite sira ba tuir enkontru no seluk tan.
Tanba pozisaun Koordenador mos responsabiliza ba materia prosesu aprendizajen nian bele, maibe bainhira hetan konvite estudante tenke lakon materia.
Nunee husu Ministeriu Edukasaun atu koloka tan profesores nain ida iha eskola refere hodi responsabilidade ba materia prosesu aprendizajen estudante segundu anu nian.
Liga asuntu nee STL tenta konfirma Diretor Servisu Munisipal Edukasaun Baucau, maibe laiha fatin atu fo komentariu.
(tom)
