DILI, STLTIMORLESTE.com – Primeiru Ministru (PM), Kay Rala Xanana Gusmão halao vizita ofisial ba Repúblika Sosialista Vietname durante loron tolu, husi 8 too 10 Junhu 2026, ho objetivu atu hametin relasaun bilateral no promove kooperasaun entre nasaun rua.
Iha loron 6 Junhu 2026, Primeiru Ministru Kay Rala Xanana Gusmão halao vizita ofisial ba Republika Sosialista Vietname ho aviaun Aero Dili, liu husi komunikadu GPM neebe STL asesu.
Tuir ajenda vizita nian, Primeiru Ministru sei halao enkontru kortezia ho Sekretáriu Jerál Partidu Komunista Vietname no Prezidente Vietname, To Lam, iha sede Sentrál Partidu nian, Segunda (08/06).
Iha Tersa (09/06), PM Xanana sei hatoo diskursu Estadu iha abertura Forum Futuru ASEAN 2026, eventu neebe halibur lideransa polítika, formuladór polítika no parseiru dezenvolvimentu sira husi rejiaun no mundu.
Iha loron hanesan, Xefe Governu sei hala’o enkontru bilaterál ho Primeiru Ministru Vietname, Le Minh Hung, atu diskute oinsa hametin tan kooperasaun entre nasaun rua iha area estratejika sira.
Hafoin reuniaun bilateral nee, Timor Leste no Vietname sei asina akordu haat, rua husi akordu hirak nee relasiona ho Edukasaun no Ensinu Superiór, ho objetivu atu promove parseria entre instituisaun akademika no peskiza, interkámbiu estudante no dosente sira, dezenvolvimentu programa formasaun no peskiza, no mos promosaun oportunidade bolsa estudu.
Akordu rua seluk kona-ba izensaun vistu ba portador pasaporte komún no kooperasaun entre Agência Noticiosa Timor Leste-TATOLI, I.P. ho Viet Nam News Agency (VNA).
Durante vizita nee, PM Xanana mos sei hasoru malu ho Prezidente Assembleia Nasionál Vietname, Tran Thanh Man, atu diskute relasaun entre instituisaun lejíslativa sira no oportunidade kooperasaun entre nasaun rua.
Iha loron Kuarta, 10 Junu 2026, Primeiru Ministru sei halao enkontru bilateral ho Subsekretária Estadu Parlamentar Reinu Unidu no Ministra ba Indo Pasífiku, Seema Malhotra MP, atu troka hanoin kona-ba asuntu rejionál no internasional.
Akompanha Primeiru Ministru durante vizita nee mak Vise Primeiru Ministru, Ministru Koordenadór ba Asuntu Ekonómiku no Ministru Turizmu no Ambiente, Francisco Kalbuadi Lay, Ministru Negosius Estranjeirus no Kooperasaun, Bendito dos Santos Freitas, Ministra Edukasaun, Dulce de Jesus Soares, Ministru Komérsiu no Indústria, Filipus Nino Pereira, Vise Ministra ba Asuntu ASEAN, Milena Maria da Costa Rangel, Sekretária Estadu Komunikasaun Sosiál, Expedito Ximenes no Xefe Gabinete Primeiru Ministru, Elizabeth Exposto.
PM Xanana ho delegasaun sei fila fali mai Dili iha loron 11 Junhu 2026 ho aviaun Aero Dili.
(joa)
