BAUCAU, STLTIMORLESTE.com – Autoridade Suku Ueru-Mata, Postu Administrativu Laga, Munisipiu Baucau, liu husi orsamentu husi Programa Nasional Dezenvimentu Suku (PNDS) tinan 2026, prioridade ba reabilitasaun estrada rural neebe sei responsabiliza husi kompanhia lokal, Manudare Unipessoal Lda.
Xefe Suku Ueru-Mata, Sabino Martins aprezenta, razaun Suku Ueru-Mata prioridade ba estrada, tanba estrada diresuan husi Suku Ueru-Mata ba Suku vizinhu Saelari ho distansia kilometru 9 kondisaun atualidade aat no grave, maibe sei cor sementi ba metru 300 no kilometru ida ba alargamentu no ateru.
“Prosesu sira ami loke ona koutasaun, kompanhia Manudare mak manan tuir Xefe IP Segunda ida nee sira komesa implementa ona,” hateren Xefe Suku Ueru-Mata Sabino Martins ba STL liu husi telefone, Segunda (08/06/2026).
Nia sublina, bainhira implementasaun projetu refere finaliza sei fo asesu ba komunidade sira husi Suku Ueru-Mata hamutuk uma kain 30 atual hela iha area Belavista Ueru-Mata leten, maibe benefisiu laos ba Suku Ueru-Mata deit, tanba estrada diresaun refere multi suku neebe sei fo benefisiu mos ba komunidade sira husi suku vizinhu Saelari.
Nia fundamenta, politika autoridade prioridade ba estrada refere, tanba estrada refere nuudar dalan alternativu no fasilita komunidade sira ba seremonia kultural, merkadu no seluk tan.
“Husi Ueru-Mata ba Saelari liu husi dalan nee besik liu, tanba liu husi Laga dook liu, entaun ita fo prioridade fo asesu besik ba ita nia komunidade,” Sabino akresenta.
Entretantu, orsamentu husi PNDS tinan 2026 ba Suku Ueru-Mata atu implementa programa reabilitasaun estrada rural nee ho total rihun US$ 30.
(tom)
