BAUCAU, STLTIMORLESTE.com – Autoridade Suku Suku Ueru-Mata, Postu Administrativu Laga, Munisipiu Baucau, husu Ministeriu Komersiu Industria (MKI) atu aselera prosesu sira kona-ba reabilitasaun fatin produsaun tua agrodenti nian, neebe iha tinan 1967 produs iha Uaitala Ueru-Mata.
Xefe Suku Ueru-Mata, Sabino Martins haktuir, tua marka Agrodenti neebe uluk konhesidu hahu iha tinan 1967 produs iha Uaitala atual Suku Ueru-Mata. Produsaun refere inisia husi sidadaun estrajeiru, iha neebe durante produsaun fo benefisiu tebes ba pesoal koa tua mutin akadiru sira husi suku sira neebe pertense iha Postu Administrativu Laga.
Tanba tua mutin husi akadiru neebe komunidade sira kada loron oferese ba nain produsaun tua agrodenti hodi transforma tua mutin akadiru ba tua agrodenti. Maibe produsaun nee lao la kleur, tanba bainhira golpe tama sidadaun estranjeiru neebe nain ba produsaun tua agrodenti refere husik fatin no fo fiar fali ba maluk estranjeiru Xineza ida, maibe produsaun refere la konsege kontinua no paradu too ohin loron.
Sabino hatete, mezmu ekipamentus ba produsaun tua agrodenti iha fatin refere atual laiha, tanba iha momentu neeba hetan estragus no uma ba produsaun mezmu hetan estragus, maibe nia estrutura balun sei mantein, tanba nee presiza halo reabilitasaun.
“Ministru Komersiu, Nino Pereira mai rasik haree ona, sira planu atu loke fali ba fabrika tua nee, maibe too agora iis seidauk mai, tanba nee ami husu justifikasaun,” hateten Sabino Martins ba STL liu husi telefone, Segunda (08/06/2026).
Nia komenta, bainhira Ministeriu Komersiu Industria nia planu ba reabilitasaun fatin refere implementa no halo duni produsaun tua agrodenti neebe nia material prima husi tua mutin akadiru, sei fo benefisiu ba komunidade koa tua sira iha Postu Administrativu Laga, espesialmente Suku Ueru-Mata rasik neebe iha akadiru barak.
Aliende mos nia dehan, se bainhira Ministeriu Komersiu Industria la iha vontade atu halo reabilitasaun ba fatin refere husu Sentru Nasional Chega (CNC-sigla português) atu prezerva sai fatin sitiu turizmu istoriku.
“Ami hakarak rekomenda ba CNC atu konserva fatin nee atu sai istoria ba rai ida nee,” Sabino sujere.
Entretantu, too notisia nee publika STL seidauk hetan komfirmasaun husi Ministeriu Komersiu Industria no Sentru Nasional Chega.
(tom)
