DILI, STLTIMORLESTE.com – Menoridade neebe halo krime labele tama iha prizaun tanba imputabilidade, nunee sei instala Sentru Juvenil atu haree ba kestaun sira nee.
“Imputabilidade katak nia minoridade hela, nia labele tama iha kadeia tanba krime neebe nia halo hela, tanba nee mos hanoin boot ida, serake aban bainrua nia idade adultu ona nia bele simu responsabilidade ou ita iha forma seluk atu bele eduka ema nee, nunee labele repete tan krime sira hanesan nee,” dehan Ministru Justisa, Sergio Hornai ba jornalista sira, hafoin halo abertura ba Formasaun Prosesu Penal iha Kaikoli, Segunda (08/06/2026).
Tuir MJ, Sentru Juvenil koresional ba sentru juvenil nee sai hanesan forma ida atu orienta formasaun ba iha jerasaun sira kulpadu, maibe tenke eduka sira sai hanesan ema, atu hadia sira nia komportamentu, fila ba uma no sosiedade atu arependimentu lao ba oin.
Nia dehan, imputabilidade krime universal, nee hanesan politika justisa prinsipiu universal katak, ema sira neebe idade minoridade pratika krime nia labele asumi responsabilidade ba iha neeba.
Tanba nee laos Timor Leste mak adopta ida nee, maibe universal, se ema idade 17 mai kraik, nia kualifika nuudar imputabilidade, signifika nia halo asaun maibe nia la iha kapasidade konhesimentu sei menus, kualifika nia inkapasidade ba iha responsabilidade.
MJ dehan, konaba instala sentru Juvenil, agora iha ona KAFI halo hela kordenasaun konsulta balu iha sentru juvenil iha Tibar neebe lao hela. No iha servisu ida atribui ba iha Direktor Nasional Reinsersaun Sosial Prizaun nian, atu halo kontaktu ida permanente hamutuk ho Diresaun Nasional Administrasaun Ministeriu Justisa, atu halo kontaktu adminstrativu.
MJ esplika, politika justisa nian mak hakarak orienta mos ba iha Politika justisa rejime juridiku ba iha joven sira sai arguidu, hanusa mak bele fo solusaun tau hamutuk iha kadeia ho adultu sira ka tau iha fatin ida atu sira mos bele hasai sira nia abilidade konhesimentu edukasaun, formasaun vokasional sira, benefisiu ba sira nia aan no mos ba sosiedade, utilidade komportamentu ba buat neebe sira halo.
Iha sorin seluk, Jurista Sergio Dias Quintas dehan, importante instala sentru juvenil, asegura direitu minoridade.
“Hau nia hanoin importante para governu estabelese sentru juvenil para asegura direitu minoridade sira nee, tanba wainhira minoridade maka pratika krime ruma sira labele kastigu hamutuk ho ema boot iha prizaun,” dehan nia.
Nia hatutan, maibe laos tanba razaun sira ida sei kiik husik deit sira livre lae, maibe wainhira iha ona sentru juvenil sei akomoda sira iha neeba hodi eduka sira portantu sentru juvenil nee importante ba vida moris Joven minoridade neebe pratika krime.
(ter)
