DILI, STLTIMORLESTE.com – Formadu Advogadu Privadu neebe tuir formasaun iha Sentru Formasaun Juridiku no Judisiariu (SFJJ) remata ona sira nia faze estajiu, no iha formadu balu la pasa iha ezame ikus.
Tuir Diretor Sentru Formasaun Juridiku no judisiariu (SFJJ), Fransisco Xavier Vasco Soares dehan, antes nee iha formadu Advogadu Privadu nain hitu (7) mak la pasa hodi ba tuir faze estajiu, tanba sira nia valor la too. No ikus mai iha faze estajiu formadu hamutuk nain 22 mak ba halao estajiu, husi teste ikus nain 2 la pasa tanba valor menus. Ho nunee formadu hamutuk nain 9 la pasa ba iha kareira Advogadu Privadu nian.
“Ba advogadu sira nee estajiu hotu tiha ona, hein para ami fo tomada de pose ba sira nain 20, sira neebe la liu tanba valor la too,” dehan nia ba jornalista sira iha Sentru Formasaun Juridiku no judisiariu Kaikoli, Segunda (08/06/2026).
Nia dehan, advogadu sira neebe mak halao estajiu nee nia valor tenke liu 10 ba leten, labele menus husi 10 mai kraik.
Nia esplika, sira la pasa nee tanba valor la too, tanba lei hateten katak valor nee tenke 10 ba leten, se menus husi nee entaun la permite no menus husi valor 9 nee labele.
Nia sublina, sira neebe la pasa nee, sira iha direitu atu hatoo rekursu kona-ba desizaun neebe SFJJ foti, tanba lei fo dalan.
Iha fatin ketak, Akademiku UNTL, Rafael de Jesus dehan, CFJJ tenke halo teste rigorozu, nunee se mak iha valor diak mak bele pasa.
“Haree formadu neebe iha valor diak mak bele pasa, atu nunee liu iha kareira nee bele investe matenek neebe nia hetan, atu lori justisa lao ba oin,” dehan nia.
Hatutan tan, tempu ona atu lori justisa lao ba oin, tanba nee tenke haree mos ema neebe iha kapasidade diak ho valor neebe diak mak bele pasa ba iha kareira advogadu.
(ter)
