DILI, STLTIMORLESTE.com – Sosis ho ayam potong la tama iha menu programa merenda eskolar iha ensinu baziku filial Hans klemm Bairo Pite.
Kestaun nee hatoo husi fornesedor merenda eskolar iha EBF Hans Klemm Bairo Pite, Rosa Martins ba STL iha Bairo Pite, Tersa nee (09/06/2026).
“Menu merenda eskolar iha loron Segunda ho Tersa naan karau halo bifi, fehuk ropa sona ho modo ben, Kuarta manu tolun ho modo been, kinta koto, menu ba iha loron sesta ninia nee fore mungu ho aifuan, hanesan hudi, apel, pateka, no ami uza ai sunu no gas. Loron ida ami tein dala rua, dader ami tein tuku lima, ami tein tuir menu manual neebe mak iha ona, sosis ho ayam potong la tama iha menu merenda eskolar,” dehan nia.
Nia dehan, estudantes sira han tuku sanolu, nee sira sai mai forma iha nee, atu nunee ida-idak bele mai foti sira nia hahan, kada loron estudantes sira sempre han aifuan, depois de sira han, sira han ho aifuan neebe ohin mensiona.
Iha fatin seluk, Koordenador Ensinu Baziku Filial (EBF) no 5 Comoro, Marcelino Moniz hatete, estudantes husi Ensinu Baziku Filial (EBF) no 5 Comoro konsumu aifuan lokal no naan karau iha programa merenda eskolar.
“Implementasaun programa merenda eskolar lao diak hanesan baibain, menu neebe mak eskola uza nee hanesan bai-bain, nee mak uza produtu lokal, hanesan modo tahan, aifual lokal hanesan pateka, aidila, apel no ayam potong, sosis, ikan nee la tama iha menu, tanba ami uza deit naan karau,” nia informa.
Nia afirma, nee duni semana ida nia laran sira han deit naan karau, modo tahan no produtu seluk tan, estudantes rihun rua resin mak asesu ba iha programa merenda eskolar, tanba nee kada loron estudantes sira asesu ba iha programa nee ho diak tebes, no ema neebe tein ba estudantes sira nee hamutuk nain 10.
“Ami nian estudantes husi eskola ida nee fahe ba iha turnu haat, tanba nee ema neebe tein ba ita nian estudantes sira han nee nain sanolu, ho nunee tein ba estudantes dader, meudia no loraik, tanba ita fahe ba iha turnu haat,” nia haktuir.
(jac)
