DILI, STLTIMORLESTE.com – Sala tolu iha Eskola ESTV-IT 28 de Novembro Becora-Díli la uza ba iha prosesu ensinu aprendizajen, tanba presiza halo reabilitasaun.
“Ami mos husu ba ministériu relevante atu mai hadia sala de aula neebe estragus ona, hodi nune’e halo reabilitasaun boot oituan. Sala de aula 9 mak presiza reabilitasaun tanba kondisaun aat total, balun uza tanba sala la sufisiente, maibe 3 mak la uza ate agora, ami hato’o tiha ona maibe seidauk responde,” dehan Diretor Eskola ESTV-IT 28 de Novembro Becora-Díli, Tomas Pinto ba STL iha nia knaar fatin, Tersa nee (09/06/2026).
Nia dehan, sala neebe ohin mensiona nee ba oin ME presiza halo reabilitasaun, atu nunee estudantes sira bele uza ba iha ensinu aprendizajen, se lae mak sala tolu nee estudantes sira labele utiliza ba iha ensinu aprendizajen.
“Asuntu ida nee ita hatoo ona ba iha parte relevantes sira atu bele resposta ba asuntu ida nee,” nia akresenta.
Entretantu Diretor Eskola Sekundariu Jeral no 4 de Setembro Balide, Sergio A. da Cruz hatete, sira nian sala ualu nee tenke halo reabilitasaun, tanba bainhira udan sala refere risku ba iha inundasaun no difikulta tebes estudantes sira, tanba sala ualu nee too agora husi parte ME nian seidauk halo reabilitasaun.
“Ami nian sala ualu nee tenke halo reabilitasaun, tanba bainhira udan sala refere sai risku ba iha inundasaun no difikulta tebes estudantes sira, tanba sala ualu nee too agora husi parte ME nian seidauk halo reabilitasaun,” katak nia.
Nia afirma, sira nian sala ualu nee iha tempu udan bee nakonu iha sala laran inklui varanda, dala ruma tahu nakonu, no bainhira estudantes sira atu uza fali nee sira tenke halo limpeza no hasai bee iha sala laran.
(jac)
