DILI, STLTIMORLESTE.com – Relasiona ho asidente neebe akontese iha Praia dos Cuqueiros iha Domingu (7/6) foin lalais nee, iha suspeitu nain rua neebe naok telefone hodi rezulta Nandine mate fatin, daudaun familia evakua fila-fali mate isin Nadine ba Mortuariu Hospital Nasional Guido Valadares (HNGV) hodi halao prosesu autopsia.
“Sim ami familia konkorda ona lori matebian ba prosesu autopsia, tanba ami tuir prosedimentu justisa nian, tanba nee nuudar aman no haree ba publiku nia kestiona makaas katak, karik la halo autopsia nee autor bele livre, depois hau hakarak autor nee bele lori ba justisa para pena neebe hanesan,” hatete matebian Nadine nia aman, Adelino do Carmo ba jornalista sira iha nia rezidènsia Bebonuk, Tersa (09/06/2026).
Nuudar famìlia ezije ba Parlamentu Nasional ho Governu, urjentemente tenke halo lei ida, lei neebe mak la justu ba ema vítima sira, bele hadia ka halo revizaun atu nunee ema hotu bele hetan justisa neebe hanesan, karik nia idade minoridade ou halo krime tenke tama kadeia. Tanba pena nee haree ba nia aktu, laos haree ba nia idade.
Nia dehan, kona-ba nia oan mate ona, maibè familia kolabora ho autoridade seguransa no justisa hodi halo autpopsia ba ninia oan.
“Hau ezije, liu-liu hau hanesan matebian nia aman ho familia ami kolabora no aseita ami nia oan halo autopsia, tanba ida nee mos ezijènsia públiku neebe fo espetativa neebe boot katak liu husi hau nia oan nee dala ruma bele fo edukasaun neebe mak diak ba ema seluk neebe mak durante nee la kolabora ho justisa hodi fo sira nia ema ba halo autopsia, tanba ida nee mak ami famìlia koko took katak liu husi hau nia oan nee bele,” esplika.
Nia deklara, liu husi sira nia oan nee bele fanu ema hotu, karik ema halo sala tenke simu konsekuensia, labele husik autor ida livre, kuandu husik autor sira livro, sira kontinua halo tan krime, dala ruma Ministeriu Publiku lori kazu nee ba too iha Tribunal maibe ba too iha neeba fo liberta, tanba dehan lei la fo dalan.
“Neebe hau ezije ba justisa tenke lao tuir nia dalan, ema neebe halo krime tenke hatan, mezmu nia idade monoridade, mas nia halo sala tenke hatan, labele kestiona nia idade minoridade, tanba ami nia oan mate tiha ona ho idade kiik, entaun tribunàl tenke kondena ema bazeia ba nia aktu, labele bazeia ba nia idade,” nia koalia.
Tuir nia katak, durante nee ema barak mak komete krime ho minoridade, maibe depois ba too iha tribunal dala barak fo liberta hotu.
“Hau nia oan nee mate tiha ona, inklui ema seluk nia oan mate, mas dala barak lei nee la fo afavor ba ema neebe mak vitima, maibe afavor fali ba ema ho minoridade, ida ne’e laiha justisa,” koalia ho oin triste.
Entretantu STL nia observasaun iha terenu katak, daudaun nee autor nain rua nee PNTL asegura hela iha sala detensaun, oras ida ou aban PNTL sei aprezenta ba MP.
(jen)
