DILI, STLTIMORLESTE.com – Inan aman hanesan ponte bá oan sira hodi hakur bá oin, tanba nee oan sira labele estraga ponte nee. Oan sira tenke tulun inan aman liu husi rona nomos halo tuir sira para labele estraga ponte neebe hakur ba.
Relasiona ho kazu hadau sasan iha motor leten neebe akontese iha rai laran, liu-liu bá kazu hadau karteira iha motor leten neebe foin akontese iha loron Domingo nee, halo alin feto nain rua duni tuir too hetan dezastre, no ikus halo nain ida mate fatin no ida seluk kanek todan. Pior liu autor bá kazu nee rasik involve husi labarik mane nain rua ho idade neebe minoridade. Haree bá kazu nee atu dehan saida los, no atu fo sala ba se los. Maibe tanba halo ona hahalok neebe ladiak no rejulta ema lakon vida, hakarak ka lakohi tenke simu nia konsekuanseia.
Tuir Profesor Silverio da Costa katak, nudar oan no estudante tenke hadomi farda neebe uza hamutuk ho isin lolon, tanba knar mak atu buka hatene, aprende nomos hanoin halo buat diak bá futuru aban bainrua nian. Tenke limiti liberdade tanba tempu nee osan mean bá nasaun, familia nomos sosiedade.
“Nuudar estudante ita tenke hadomi farda hanesan ita nia aan no isin lolon. Halo farda hamutuk ho isin lolon, tanba knar Ita estudante no oan nian mak atu buka hatene, aprende nomos halo no hanoin buat diak bá futuru aban bainrua nian. Tanba nee tenke rona onan aman koalia, basa sira mak ponte bá oan ita atu hakur bá. Iha uma tenke rona no halo tuir inan aman sira, nunee mós bainhira mai eskola rona mos professore sira, tanba ami mak sai fali imi nia inan aman. Neebe labele estraga ponte nee, selae ita nia futuru sei la naroman,” dehan nia bá STL iha Komoro, Tersa (09/06/2026).
Nia hatete, oan estudante sira balun rona inan aman no balun mak lakohi atu rona, maibe knar no vontade nudar inan aman nian labele lakon, nafatin kontrola no fo atensaun nafatin, atu nunee loron ida sei muda sira nia hahalok nee sai ema neebe diak. Sekuandu inan aman senti kolen no lakon vontade atu nafatin kontrolu, oan sira sei monu bá dalan neebe lalos.
Nunee mós Professora Brigida Faustina Soares katak, haree bá kazu naok iha motor leten too hakotu ema nia vida, nee triste tebes. Kazu sira nee atu dehan saida, too akontese ona hanesan nee atu fo sala ba se. Nee hanesan lisaun ida no bolu atensaun bá Inan aman sira, atu kontrola no atensaun bá oan sira nia movimentu sira iha uma. Labele husik sira tama sai livre, oan sira presiza inan aman nia liafuan hodi fo hanoin bá sira lor-loron iha uma no eskola. Sira nia tempu iha eskola oituan deit barak liu mak iha uma ho inan sira.
Tuir nia, bainhira akontese ona hanesan nee atu fo sala bá se los. Labele fo sala ba eskola, tanba sira la hamutuk. Inan aman entrega deit oan ba eskola, maibe oras barak ho inan aman iha uma, oras oituan mak iha uma. Neebe oan sira nia futuru nee 100% iha Inan aman sira nia liman.
Iha sorin seluk, tuir informasaun neebe diariu nee asesu katak, kazu nee akontese iha Pantai Kelapa, Domingu (07/06/2026). Polisia Nasional Timor Leste liu husi ekipa konjunta konsege kaer ona suspeitu nain 2 neebe involve iha kazu refere. Suspeitu ida ho naran JACR, naran bolu “T”, alegadamente hanesan ema neebe lori motor durante akontesimentu.
Enkuantu suspeitu seluk, MJX, naran bolu “J” alegadamente envolve iha asaun hadau sasan vítima nian.
Entertantu Matebian Nadine B.R. do Carmo, estudante husi Eskola Katólika São Pedro, nunu ano, turma A. Nia nuudar aluna feto neebe matenek no tuir atividade barak iha eskola.
Tuir Estudante oitavo ano Eskola Sao Pedro, Amelia da Costa dehan, antes matebian Nadine hetan dezastre too husik hela familia no kolega sira hotu, iha Sabadu loraik depois fila husi eskola nia kaer hela aifuan bucket kor pink iha liman, matebian nee hasee no hamnasa ho nia, no sei goja hela nia hodi dehan, Amelia aifuan nee kapas los, se mak fo. Nunee ho hamnasa Nia hatan hodi dehan bá matebian katak, aifuan nee husi doben, rona ida nee Matebian hamnasa los.
“Triste los bainhira rona novidade katak, bin Nadine husik ona mundu nee. Nadine feto neebe bonita, matenek, la haloan, hasee no ligador. Nia feto ida neebe tuir atividade barak iha eskola, tuir konsellu, taekwondo, sertame, oratoriu no atividade seluk tan. Bá ami Eskola Sao Pedro, senti lakon tebes kolega no ema diak ida iha ami leet,” dehan nia ho triste.
Nia hatutan, tuir los ohin atu misa funeral Matebian nian iha Igreja Maria Auxiliadora Komoro, maibe informasaun husi familia katak adia fali tanba Polisi husu atu halo autopsia, neemak familia koopera hodi entrega bá halo autopsia.
(dom)
