DILI, STLTIMORLESTE.com – Tribunal Judisial Primeira Instansia Dili (TJPID) liu husi leitura akordaun deside absolve arguidu inisial JP, HdC, RdSG, HG, LBF, EdC no kondena arguidu DIBS hanesan nain ba klinika ho pena multa.
Iha leitura akordaun nee, Juiz koletivu entende katak, la iha provas konkretu atu kondena arguidu JP, HdC, RdSG, HG, LBF no EdC.
Tribunal entende, arguidu nain neen nia hahalok sira nia envolvimentu la halo vitima Helena Ximenes mate, tanba nee mak absolve sira husi krime refere.
“Ba empreza Tribunal aplika multa, tanba nia hatama aimoruk seim halo deklarasaun ba autoridade kompetente, tanba nee Tribunal entende se la iha rekursu, iha futuru empreza sei selu multa dolar rihun neen nulu resin hitu ba Tribunal, tanba hatama item aimoruk seim halo rejistu antes,” dehan Advogadu Privadu Pedro Camoes.
Nia hatutan, iha kestaun ida nee empreza hatama tiha aimoruk sem halo deklarasaun, ida nee mak kondena nain ba klinika selu multa.
Nia sublina, arguidu nain neen seluk Tribunal absolve, tanba la iha provas konkretu katak vitima neebe mate laos sira nia komportamentu no sira nia hahalok, maibe ba kompanhia nain mak Tribunal kondena multa.
Advogadu nee hatutan, multa neebe iha makaas, tanba nee sira nia parte labele fo komentariu lai atu halo rekursu ka lae, tanba too agora sira seidauk simu notifikasaun desizaun husi Tribunal. Banhira simu notifikasaun kona-ba desizaun nian mak foin haree atu deside halo rekursu ka lae.
Audensia Julgamentu nee prezide husi Juiz koletiva, Argentino Nunes, Ivan Patrocenio no Zulmira Auxiliadora, MP reprezenta husi Prokurador Matias Soares, no arguidu sira hetan asistensia legal husi Defensor Publiku Manuel Amaral no Advogadu privadu Pedro Camoes.
(ter)
