DILI, STLTIMORLESTE.com – Tribunal Judisial Primeira Instansia Dili (TJPID) liu husi leitura akordaun deside aplika pena prizaun tinan 12 ba arguida ho inisial ML nuudar bebe nia inan neebe soe bebe iha lixu iha tinan 2023.
Iha leitura akordaun nee Juiza prosesu deklara katak, faktus sira neebe mak Ministeriu Publiku (MP) dun ba arguida nee provadu hotu kedas, tanba durante prosesu julgamentu lao arguida konfesa faktus no nia rekonhese katak, bebe neebe mak nia soe nee nia oan duni.
Haree ba faktus sira nee hotu, Tribunal koletivu deside hodi aplika pena prizaun tinan 12, atu nunee arguida bele responsabiliza ba aktu neebe mak nia rasik komete.
Hafoin desizaun, Defeza ba arguida Advogadu Privadu, Agustinho de Jesus hateten, iha akuzasaun MP akuza arguida ho krime infantisidiu, maibe bainhira julgamentu lao, MP rekere ba Tribunal atu halo alterasaun kualifikasaun Juridiku husi krime infantisidiu ba fali krime Omisidiu Agravadu.
“Ohin Tribunal lee sai akordaun, Ministeriu Publiku halo akuzasaun mai krime infantisidiu no julgamentu lao Tribunal rona MP nia rekerimentu halo alterasaun husi krime infantisidiu ba fali krime Omesidu Agravadu, tanba nee parte Defeza la konkorda hodi hatama pozisaun,” dehan nia ba jornalista sira Tersa nee.
Tuir Agostinho, Tribunal direitamente lee ona desizaun sentensa ba nia kliente. Tribunal intende katak rekerimentu MP nia nee nesesariu tanba dehan katak la eziste iha perturbasaun ba inan neebe partu nia oan, entaun Tribunal halo tiha alterasaun ba krime omisidiu Agravadu.
Tanba nee, hanesan parte Defeza la konkorda ho desizaun ida nee sei halo rekursu ba Tribunal neebe mak aas, tanba krime Homesidu Agravadu nee, nia pena aas husi tinan 12 too 20 depende ba nia kodigu penal ba krime Homesidu Agravadu, tanba nee mak Tribunal aplika pena prizaun tinan 12 aas, triste tanba aktu neebe mak inan feton nee vulneravel.
Nia sublina, durante prosesu julgamentu lao, arguida konfesa faktus no la nega faktus neebe mak iha. Tanba Tribunal halo alterasaun ba krime omisidiu Agravadu nee iha kodigu penal Timor Leste, pena kastigu nee nia modura husi tinan 12 to tinan 20 no krime Infantisidiu nee, nia modura tinan tolu (3) too tinan 10.
Defeza nee esplika, nia kliente la kompriende klean kona ba perguntas tetun, nia koalia mak Baikenu ida nee mak dala ruma iha interpretasaun, entaun nia konfesa faktus katak nia halo, maibe laos krime omisidiu Agravadu, maibe krime Infantisidiu neebe mak previstu iha artigu 142 laos ba omisidiu Agravadu.
“Hau nia hakarak nee krime mantein infantisidiu tanba nia modura penal nee tinan tolu to ba tinan 12 . Agora lei 142 nee espesial atu proteje inan sira neebe mak la sustenta labarik sira nee. Nunee ohin desizaun Tribunal nia aplika pena prizaun tinan 12 ba hau nia kliente,” dehan nia.
Tuir kronolojia katak, akontesimentu nee iha loron 15 fulan Dezembru tinan 2023, por volta 5h00 dader, arguida partus bebe feto ida no ikus estraga tiha bebe nee, tanba deit arguida sente mesak la iha ema ida atu responsavel.
Arguida halo krime ho livre, deliberada, konsientemente no hatene katak hahalok nee proibidu no hetan pena tuir lei penal.
Tanba nee MP akuza arguida hanesan autor material ba krime Infantisidiu previstu iha artigu 142 husi kodigu Penal Timor Leste.
Audensia Julgamentu nee, prezide husi Juiz kolektiva, Ministeriu Publiku reprezenta husi Prokurador nain ida, no arguida hetan asistensia legal husi Advogadu Privadu nain ida.
(ter)
