VIETNAM, STLTIMORLESTE.com – Timor Leste (TL) hakarak aprende barak husi nasaun membru sira Association of Southeast Asian Nations (ASEAN), liu-liu nasaun Vietnam iha ninia dezenvolvimentu ekonomia nasional.
Primeiru Ministru (PM), Kay Rala Xanana Gusmão deklara assuntu nee durante vizita ba Parke Industriál Vietname-Singapura (VSIP) ne’ebé lokaliza iha Sidade Thuan An, Provinsia Binh Duong, Segunda (08/06), nuudar parte husi vizita ofisiál bá Vietnam.
“Nuudar membru foun ASEAN nian ami aseita hala’o vizita iha Vietnam atu aprende husi imi. Hau mai dahuluk Vietnam iha tinan 2000 no agora hau mai fali haree mudansa boot tebes kompara ho situasaun iha tempu neeba. Ho vizita ida-nee, ami hakarak estabelese kooperasaun entre país ASEAN sira. Ami presiza aprende husi imi, liu-liu iha area ekonomia, agrikultura no agroindústria,” hateten PM Xanana liu husi nota komunikadu neebe STL asesu husi media Gabinete Primeiru Ministru iha Tersa (09/06/2026).
Primeiru Ministru mos manifesta interese atu estabelese kooperasaun ho VSIP, inklui oportunidade ba foin-sae Timoroan sira atu hetan formasaun no esperiensia iha seitor industrial. Asuntu nee sei sai parte hosi diskusaun iha fórun ASEAN sira iha futuru.
Iha enkontru nee, Vise-Prezidente Provinsia Bac Ninh, Le Xuan Loi, destaka relasaun amizade neebe kleur ona entre Vietname ho Timor-Leste neebe lembra katak Vietnam nuudar nasaun ida neebe rekonese Frente Revolusionaria ba Timor-Leste Independente (FRETILIN) iha Setembru 1975, no nasaun rua nee estabelese relasaun diplomatika ofisial iha 28 Julhu 2002.
Le Xuan Loi hateten, relasaun entre Vietnam ho Timor Leste kontinua dezenvolve relasaun diak durante tinan hirak liu-ba, liu-husi kontaktu politiku no diplomatiku iha nivel aas, inklui iha eventu no enkontru ASEAN sira.
Ho vizita Primeiru Ministru Xanana Gusmão ba Bac Ninh nia espera katak, sei sai marka importante ida hodi haburas kooperasaun entre provínsia nee ho parseiru sira iha Timor Leste, liu-liu iha area industria, investimentu no empregu.
“Hau espera katak delegasaun Timor Leste bele hetan informasaun barak kona-ba dezenvolvimentu zona industrial sira iha Bac Ninh no estuda possibilidade atu adapta modelu hanesan nee iha Timor Leste. Fulan ida liu ba, ami mos diskute ho Ministru Empregu Timor Leste no Embaixador Timor Leste iha Vietname kona-ba oportunidade atu lori trabalhador Timoroan sira mai servisu iha parke industriál sira iha provínsia nee,” nia atualiza.
Le Xuan Loi konsidera lideransa PM Xanana bele lori relasaun bilateral entre nasaun rua nee ba nivel aas liu-tan no kontribui ba paz, estabilidade no dezenvolvimentu iha rejiaun Sudeste Aziatiku.
Parke Industrial Vietnam-Singapura (VSIP) konsideradu hanesan simbolu relasaun metin no kooperasaun ekonomika entre Vietname ho Singapura. Empreza nee harii liu-husi parseria entre Becamex IDC Corporation hosi Vietname no Sembcorp Development hosi Singapura ho apoiu husi governu nasaun rua nian.
Akompanha Primeiru Ministru iha vizita ofisial nee Vise Primeiru Ministru no Ministru Koordenador Asuntu Ekonomiku no Ministru Turizmu no Ambiente, Francisco Kalbuadi Lay; Vise Primeiru Ministru Koordenador Asuntu Sosial no Ministru Dezenvolvimentu Rural no Abitasaun Komunitária, Mariano Assanami Sabino; Ministru Negosiu Estranjeiru no Kooperasaun, Bendito dos Santos Freitas; Ministra Edukasaun, Dulce de Jesus Soares; Ministru Komersiu no Industria, Filipus Nino Pereira; Vise-Ministra Asuntu ASEAN, Milena Maria da Costa Rangel; Sekretariu Estadu Komunikasaun Sosial, Expedito Dias Ximenes no Xefe Gabinete Primeiru Ministru, Elizabeth Exposto.
(alb)
